برطانوی شاہی خاندان ہمیشہ سے عوامی زندگی میں انتہائی باوقار، رسمی اور نجی رہنے کی روایت برقرار رکھنے کی کوشش کرتا رہا ہے۔ ان کی عوامی مصروفیات کو سخت نگرانی میں رکھا جاتا ہے اور ان کے باضابطہ بیانات ہمیشہ نپے تلے ہوتے ہیں، جبکہ ذاتی معاملات کو عام طور پر خفیہ رکھا جاتا ہے۔
تاریخ میں کچھ ایسے مواقع بھی آئے ہیں جب شاہی خاندان کے ارکان کے انٹرویوز نے روایتی خاموشی کو توڑ کر دنیا بھر میں تنازعات کو جنم دیا اور بادشاہت کو مشکل ترین دور میں دھکیل دیا۔
اس سلسلے کا پہلا بڑا دھماکا مارچ 2021 میں ہوا، جب شہزادہ ہیری اور میگھن مارکل نے مشہور امریکی میزبان اوپرا ونفرے کو ایک انٹرویو دیا۔ اس انٹرویو میں جوڑے نے شاہی فرائض سے دستبرداری کی وجوہات بتانے کے ساتھ ساتھ شاہی محل کے اندر نسل پرستی اور ذہنی صحت کے مسائل کے حوالے سے سنسنی خیز انکشافات کیے۔
اسی طرح نومبر 2019 میں شہزادہ اینڈریو کا بی بی سی کو دیا گیا انٹرویو شاہی تاریخ کی سب سے بڑی سفارتی اور عوامی ناکامی ثابت ہوا، جس میں بدنامِ زمانہ مجرم جیفری ایپسٹین کے ساتھ اپنے تعلقات کی صفائی دینے کی ناکام کوشش کے بعد انہیں عوامی زندگی سے فوری طور پر پیچھے ہٹنا پڑا۔
دوسری جانب موجودہ بادشاہ کنگ چارلس سوم نے بھی ماضی میں (بطور پرنس آف ویلز) ایک دستاویزی فلم کے دوران لیڈی ڈیانا کے ساتھ تعلقات میں بے وفائی کا اعتراف کر کے سرخیاں بٹوریں۔ ان سے جب پوچھا گیا کہ کیا وہ ڈیانا کے ساتھ وفادار رہے، تو انہوں نے اعتراف کیا کہ ’وہ وفادار رہے، جب تک کہ معاملات بالکل ہی خراب نہیں ہو گئے‘۔
مزید برآں، شہزادہ ولیم اور شہزادہ ہیری نے سال 2017 میں اپنی والدہ کی 20 ویں برسی کے موقع پر جذباتی انٹرویوز دیے، اور واضح کیا کہ یہ پہلا اور آخری موقع ہے جب وہ اس موضوع پر اتنی کھل کر بات کررہے ہیں۔
برطانوی شاہی تاریخ کا سب سے بڑا اور یادگار دھماکا 20 نومبر 1995 کو ہوا، جب شہزادی ڈیانا نے بی بی سی کے پروگرام ’پینوراما‘ میں ایک انٹرویو دیا۔ اس 54 منٹ کی گفتگو میں انہوں نے اپنی شادی کی ناکامی پر بات کرتے ہوئے وہ مشہورِ زمانہ جملہ کہا کہ ’ہماری اس شادی میں تین لوگ شامل تھے‘، جس نے شاہی محل کا روایتی پردہ چاک کر دیا۔
اس انٹرویو کے بعد برطانوی شاہی خاندان کا وہ محتاط اور محفوظ امیج ہمیشہ کے لیے بدل گیا جو صدیوں سے قائم تھا۔
