امریکی صدر ڈونلڈ ٹرمپ کے نومبر میں ہونے والے امریکی وسط مدتی انتخابات سے قبل ایران پر حملہ نہ کرنے کے بیان کے بعد عالمی منڈی میں خام تیل کی قیمتوں میں کمی ریکارڈ کی گئی ہے۔ جمعرات کو نمایاں اضافے کے بعد برینٹ اور امریکی خام تیل دونوں سستے ہوگئے ہیں۔
جمعے کے روز عالمی منڈی میں خام تیل کی قیمتوں میں کمی دیکھی گئی ہے، جس کی وجہ امریکی صدر ڈونلڈ ٹرمپ کا ایران پر حملے سے متعلق بیان بتایا جارہا ہے۔
برطانوی خبر رساں ادارے رائٹرز کے مطابق آج دوپہر کے بعد برینٹ خام تیل کے مستقبل کے سودوں کی قیمت ایک ڈالر 10 سینٹ یعنی تقریباً 1.1 فیصد کمی کے بعد 103.18 ڈالر فی بیرل ہوگئی۔
اسی طرح عالمی معیار کا امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کی قیمت بھی 49 سینٹ، یعنی 0.5 فیصد کمی ریکارڈ کی گئی، جس کے بعد یہ 91 ڈالر فی بیرل پر آگئی جب کہ گزشتہ روز عالمی منڈی میں خام تیل کی قیمتوں میں نمایاں اضافہ ہوا تھا۔
خام تیل کی قیمتوں میں کمی کا رجحان صدر ٹرمپ کے اس بیان کے بعد سامنے آیا ہے جس میں انہوں نے کہا تھا کہ مڈٹرم الیکشن سے قبل ایران پر حملہ نہیں کریں گے۔ خیال رہے کہ اس سے قبل خام تیل کی ترسیل پرانی سطح پر بحال ہوگئی ہے۔
امریکی صدر ڈونلڈ ترمپ نے بھی انتخابی ریلی سے خطاب میں تیل قیمتوں میں اضافے کو مصنوعی اور تیل کمپنیوں کے زیادہ منافع کمانے کی لالچ کو ٹھہرایا تھا تاہم ماہرین اس کی وجہ ریفائنری میں بڑھتے ہوئے اخراجات کو قرار دیا ہے۔
واضح رہے کہ مارچ سے ایران نے اسرائیل اور امریکا کے حملوں کے جواب میں آبنائے ہرمز کو بند کر رکھا ہے جہاں ے دنیا کو تیل و گیس کی بڑی مقدار ترسیل کی جاتی ہے جب کہ حوثیوں نے باب المندب میں سعودی بحریہ کی ناکہ بندی کر رکھی ہے۔
