نیٹ فلکس نے اکتوبر کے لیے نئی فلموں، ڈراما سیریز اور معروف فنکاروں کی زندگی پر مبنی سنسنی خیز دستاویزی فلموں کے شاندار شیڈول کا اعلان کر دیا ہے جس میں بن ایفلک اور فلوئیرنس پیو جیسے بڑے ستارے جلوہ گر ہو رہے ہیں۔
اسٹریمنگ انڈسٹری کی معروف کمپنی نیٹ فلکس اپنے صارفین کے لیے اکتوبر کے مہینے میں نایاب اور تفریح سے بھرپور مواد پیش کر رہی ہے۔
اس ماہ کے شیڈول میں بن ایفلک کی سنسنی خیز فلم ’اینیملیز‘، جان اسٹین بیک کے مشہور ناول پر مبنی سیریز ’ایسٹ آف ایڈن‘، اور نِک لوڈین کی سیریز ’وکٹوریئس‘ کا اسپن آف ’ہالی ووڈ آرٹس‘شامل ہیں۔
اس کے ساتھ ساتھ ’دی ڈپلومیٹ‘، ’لوپن‘اور ’نو باڈی وانٹس دِس‘کے نئے سیزنز بھی ناظرین کی توجہ کا مرکز بنیں گے۔ اس کے علاوہ آنجہانی میتھیو پیری، مارٹن مل، نارم میکڈونلڈ اور ماریا بيمفورڈ جیسے مزاحیہ فنکاروں کی زندگیوں پر مبنی ڈاکیومنٹریز بھی ریلیز کی جا رہی ہیں۔
’ایسٹ آف ایڈن‘ اور ’کریزی رچ، انکریڈیبلی بروک‘ سے ماہ کا آغاز
ماہِ اکتوبر کی شروعات میں یکم اکتوبر کو نیٹ فلکس کا سب سے اہم ڈراما ’ایسٹ آف ایڈن‘ ریلیز ہو رہا ہے۔ 7 قسطوں پر مشتمل یہ سیریز جان اسٹین بیک کے 1952 میں شائع ہونے والے شہرہ آفاق ناول سے ماخوذ ہے جو ہابیل اور قابیل کی بائبل کی کہانی سے متاثر ہو کر لکھا گیا تھا۔
زوئے کازان کی تخلیق کردہ اس سیریز میں فلوئیرنس پیو نے ’کیتھی ایمز‘ کا مرکزی کردار ادا کیا ہے، جبکہ ان کے ساتھ کرسٹوفر ایبٹ اور مائیک فائسٹ بھی شامل ہیں۔ یہ کہانی دو بھائیوں اور کیتھی ایمز کی پیچیدہ زندگی، خاندانی رقابت، محبت اور عزائم کا احاطہ کرتی ہے۔
اسی تاریخ یعنی یکم اکتوبر کو کامیڈی سیریز ’کریزی رچ، انکریڈیبلی بروک‘ بھی ریلیز کی جا رہی ہے۔
یہ کہانی امیر کبیر ’الثہابی‘ خاندان کے گرد گھومتی ہے جو عیش و عشرت اور سماجی مقام و مرتبے کے عادی ہیں، لیکن اچانک مالی بحران کا شکار ہو جاتے ہیں۔
اپنے مسائل کو تسلیم کرنے کے بجائے یہ خاندان اپنی ظاہری شان و شوکت برقرار رکھنے کی کوشش کرتا ہے جس سے دلچسپ اور مزاحیہ صورتحال جنم لیتی ہے۔
بن ایفلک کی ’اینیملیز‘ اور مارٹن مل کی ڈاکیومنٹری
فنکار اور کامیڈین مارٹن مل کی زندگی پر مبنی ڈاکیومنٹری ’ہو از مارٹن مل؟‘ 7 اکتوبر کو پیش کی جائے گی، جس میں ان کے مختلف شعبوں میں کیریئر اور ان کے ساتھ کام کرنے والے افراد کے تاثرات دکھائے جائیں گے۔
ماہ اکتوبر کی سب سے بڑی اور متوقع فلم ’اینیملیز‘ 9 اکتوبر کو نیٹ فلکس پر دستیاب ہوگی۔
اس تھرلر فلم میں بن ایفلک اور کیری واشنگٹن نے مرکزی کردار ادا کیے ہیں۔ کہانی لاس اینجلس کے میئر کے امیدوار مارک کمبل (بن ایفلک) کے گرد گھومتی ہے جس کا بیٹا اغوا ہو جاتا ہے۔
وہ اور ان کی اہلیہ ابیگیل (کیری واشنگٹن) بیٹے کی بازیابی کی کوششوں کے دوران سنگین رازوں کا سامنا کرتے ہیں۔ اس فلم کی ہدایت کاری اور شریک تحریر کے فرائض بھی بن ایفلک نے انجام دیے ہیں، جبکہ کاسٹ میں گلیئن اینڈرسن، اسٹیون ین، ایڈریا نا پاز اور لوئس گیرارڈو مینڈوزا شامل ہیں۔
مقبول سیریز کے نئے سیزنز اور ’ہالی ووڈ آرٹس‘
نِک لوڈین کی مقبول سیریز ’وکٹوریئس‘ کے مداحوں کے لیے 15 اکتوبر کو اسپن آف سیریز ’ہالی ووڈ آرٹس‘ لائی جا رہی ہے۔
ڈینیئلا مونیٹ اپنے پرانے کردار ’ٹرینا ویگا‘ کے ساتھ واپسی کر رہی ہیں، جو اداکاری میں ناکامی کے بعد اب پرفارمنگ آرٹس اسکول میں قائم مقام ٹیچر بن چکی ہیں۔
اس سیریز میں ایویٹ نیکول براؤن بھی پرنسپل ہیلن کے روپ میں دوبارہ نظر آئیں گی۔
اسی دن یعنی 15 اکتوبر کو پولیٹیکل تھرلر سیریز ’دی ڈپلومیٹ‘ کا سیزن 4 جاری کیا جائے گا۔ کیری رسل سفارت کار کیٹ وائلر کے کردار میں واپسی کر رہی ہیں جو امریکا اور برطانیہ کے درمیان بڑھتی ہوئی کشیدگی اور اپنے شوہر ہل (روفس سیویل) کے ساتھ تعلقات کے تناؤ سے نمٹتی نظر آئیں گی۔
کامیڈی ڈراما ’نو باڈی وانٹس دِس‘ کا سیزن 3 بھی 22 اکتوبر کو ریلیز ہو رہا ہے جس میں کرسٹن بیل اور ایڈم بروڈی دوبارہ جوآن اور نوح کے کرداروں میں اکٹھے زندگی تعمیر کرنے کی کوششیں کرتے دکھائے جائیں گے۔
فرانسیسی کرائم سیریز ’لوپن‘ کا چوتھا پارٹ 23 اکتوبر کو آرہا ہے۔ عمر سے ایک بار پھر ماہر چور ’آسان دیوپ‘ کا کردار نبھا رہے ہیں۔
پچھلے سیزن کے 4 سال بعد کی کہانی میں جیل میں قید آسان دیوپ کو حالات ایک بار پھر جرم کی دنیا میں کھینچ لاتے ہیں۔ یہ سیریز 2021 میں اپنے آغاز کے بعد سے نیٹ فلکس کی سب سے کامیاب فرانسیسی پیشکشوں میں سے ایک ہے۔
لیجنڈز کی زندگی پر بننے والی دستاویزی فلمیں
کامیڈین نارم میکڈونلڈ کی زندگی پر جڈ اپاٹو کی ہدایت کاری میں بنی ڈاکیومنٹری ’نارم: دی ٹیل آف نارم میکڈونلڈ‘ 16 اکتوبر کو ریلیز ہوگی جس میں ان کے ‘سیٹرڈے نائٹ لائیو’ اور اسٹینڈ اپ کیریئر کا احاطہ کیا گیا ہے۔
کامیڈین ماریا بيمفورڈ کے کیریئر اور ذہنی صحت کے مسائل پر مبنی ڈاکیومنٹری ’پیرالائزڈ بائے ہوپ: دی ماریا بيمفورڈ اسٹوری‘ 23 اکتوبر کو پیش کی جائے گی۔
اس کے علاوہ 27 اکتوبر کو مشہور ڈرامے ’فرینڈز‘کے سدا بہار اداکار میتھیو پیری کی زندگی پر 3 اقساط پر مشتمل سیریز ’دی ون اباؤٹ میتھیو پیری‘کا آغاز ہوگا۔
اس میں ان کی عالمی شہرت، نشے کی لت سے جنگ اور زندگی کی مشکلات کو انٹرویوز اور نایاب فوٹیج کے ذریعے پیش کیا جائے گا۔
ہالووین کے حوالے سے کلاسک فلموں کی واپسی
نئے مواد کے علاوہ نیٹ فلکس اکتوبر میں ہالووین کا سیزن منانے کے لیے کلاسک ہارر فلمیں بھی واپس لا رہا ہے۔
سپر نیچرل رومانس کے لیے ’ٹوائلائٹ‘ فلم سیریز، سنسنی سے بھرپور الفریڈ ہچکاک کی کلاسک سائیکولوجیکل تھرلر ’سائیکو‘اور روایتی ہارر فلم ’فرائیڈے دی 13تھ‘ شامل ہیں۔
جبکہ ہارر اور کامیڈی کے امتزاج کے شوقین افراد کے لیے ’اے ہونٹڈ ہاؤس‘ اور اس کا سیکوئل بھی دستیاب ہوں گے۔
نیٹ فلکس ہر سال اکتوبر کے مہینے میں ہالووین اور موسم سرما کے آغاز کی مناسبت سے اپنے صارفین کے لیے خصوصی مواد پیش کرتا ہے۔
عالمی سطح پر مختلف اصناف کی بڑھتی ہوئی مانگ کو مدنظر رکھتے ہوئے، نیٹ فلکس کی جانب سے اس بار ڈراما، سسپنس، کامیڈی اور حقیقی سوانحی ڈاکیومنٹریز کا ایک متوازن شیڈول تیار کیا گیا ہے۔
