پاکستان مسلم لیگ ن،متحدہ عرب امارات منارٹی ونگ کے صدر جان قادر نے ایک وفد کے ہمراہ گورنر ہاؤس میں گورنر سندھ نہال ہاشمی سے ملاقات کی اور کراچی میں مقیم مسیحیوں کے مسائل سے آگاہ کیا-
اس ملاقات میں شیپرڈ عمران خراعت اور پاسٹر شمعون اقبال سمیت دیگر مسیحی نمائندگان بھی موجود تھے۔
مسیحی وفد نے گورنر سندھ نہال ہاشمی اور ان کے اسٹاف کی جانب سے پرتپاک استقبال اور محبت بھرے رویے پر تہہ دل سے شکریہ ادا کیا۔ وفد نے دعا کی کہ اللہ تعالیٰ گورنر سندھ اور ان کی پوری ٹیم کو دانائی، فہم و فراست عطا فرمائے تاکہ وہ ملک و قوم کی ترقی، خوشحالی اور عوام کی خدمت کے لیے بھرپور کردار ادا کریں۔ ملاقات کے دوران وفد نے گورنر سندھ کو ایک تحریری درخواست بھی پیش کی، جس میں ناظم آباد، سراج کالونی کراچی کے تقریباً 60 سال پرانے چرچ کے لیے سولر سسٹم فراہم کرنے کی درخواست کی گئی۔ وفد کے مطابق اس علاقے میں ایک بڑی مسیحی آبادی موجود ہے اور یہ چرچ انٹر ڈینومینیشنل حیثیت رکھتا ہے، جہاں مختلف مسیحی فرقوں سے تعلق رکھنے والے افراد اتوار کی عبادات کے علاوہ ہفتے کے دیگر دنوں میں بھی دعا اور عبادت کے لیے آتے ہیں۔وفد نے واضح کیا کہ چرچ کی عمارت کے نچلے حصے میں ایک بڑا کمیونٹی ہال بھی موجود ہے، جسے مسیحی خاندان اپنے عزیزوں کی وفات کے بعد دعائیہ اجتماعات اور دیگر مذہبی و سماجی ضروریات کے لیے استعمال کرتے ہیں۔ بجلی کی طویل لوڈشیڈنگ کے باعث عبادت گزاروں اور مقامی مسیحی خاندانوں کو شدید مشکلات کا سامنا کرنا پڑتا ہے۔
درخواست میں حکومت کی جانب سے صوبوں کو فراہم کیے گئے مائنورٹی فنڈز میں سے سراج کالونی کے چرچ کے لیے سولر سسٹم کی منظوری اور فراہمی کی خصوصی درخواست کی گئی ہے، تاکہ عبادت گاہ میں بجلی کی بنیادی سہولت بہتر بنائی جا سکے۔وفد نے بھٹو کالونی کی صورتحال بھی گورنر سندھ کے سامنے رکھی، جہاں مقامی لوگوں کے مطابق طویل دورانیے کی لوڈشیڈنگ کے باعث شدید مشکلات پیدا ہوتی ہیں۔ وفد نے حکومت سندھ سے مطالبہ کیا کہ مسیحی آبادیوں اور چرچز کی ضروریات کو بھی مائنورٹی فنڈز کے ذریعے ترجیحی بنیادوں پر پورا کیا جائے۔
اس موقع پر وفد نے پاکستان مسلم لیگ (ن) کے اقلیتی امور اور مذہبی ہم آہنگی کے وزیر کھیل داس کوہستانی سے بھی اپیل کی کہ سندھ کے لیے مختص اقلیتی فنڈز میں مسیحی چرچز اور مسیحی آبادیوں کی ضروریات کو خصوصی طور پر مدنظر رکھا جائے اور انہیں سولر سسٹم سمیت بنیادی سہولیات کی فراہمی میں معاونت کی جائے۔
