کراچے کے علاقے منظور کالونی میں خطرناک واقعہ پیش آیا جہاں ایک پھل فروش نے اپنی جان کی پرواہ کیے بغیر پانی سے بھرے تقریباً 7 فٹ گہرے کھلے گڑھے میں گرنے والے سائیکل سوار بچے کو بروقت نکال کر اس کی جان بچا لی۔
سی سی ٹی وی فوٹیج کے مطابق بچہ سائیکل چلاتے ہوئے اچانک سڑک پر موجود پانی سے بھرے کھلے گڑھے میں جا گرا۔ اسی دوران قریب سے گزرنے والے پھل فروش نے لمحہ بھر کی تاخیر کیے بغیر گڑھے میں چھلانگ لگا دی اور بچے کو محفوظ طریقے سے باہر نکال لیا۔
واقعے کے فوراً بعد مقامی افراد بھی موقع پر پہنچ گئے اور بچے کی مدد کی، بروقت کارروائی کے باعث ایک ممکنہ سانحہ ٹل گیا۔ متعدد سوشل میڈیا صارفین نے بلاول بھٹو پر تنقید کرتے ہوئے کہا کہ سیاسی بیانات دینے کے بجائے کراچی کی ابتر صورتحال پر توجہ دی جائے جہاں ناقص انفراسٹرکچر شہریوں کی جانوں کے لیے مسلسل خطرہ بنا ہوا ہے۔
اس واقعے نے ایک بار پھر کراچی میں خراب انفراسٹرکچر، کھلے گڑھوں اور شہریوں کی حفاظت سے متعلق سنگین خدشات کو اجاگر کر دیا ہے۔ شہریوں کا کہنا ہے کہ ایسے خطرناک گڑھے روزانہ حادثات کا سبب بن رہے ہیں جنہیں فوری طور پر بند کیا جانا چاہیے۔
دوسری جانب پھل فروش کے جرأت مندانہ اقدام کو سوشل میڈیا پر بھرپور سراہا جا رہا ہے جہاں شہری انہیں ’حقیقی ہیرو‘ قرار دیتے ہوئے ان کے جذبۂ انسانیت کو خراجِ تحسین پیش کر رہے ہیں۔
