ایرانی پارلیمنٹ کے اسپیکر محمد باقر قالیباف نے کہا ہے کہ امریکا کے ساتھ مذاکرات میں پیشرفت کا واحد راستہ ایران کی جانب سے پیش کی گئی 7 شرائط کو تسلیم کرنا ہے، ان شرائط کے بغیر مذاکرات آگے نہیں بڑھ سکتے۔
سوشل میڈیا پر جاری اپنے بیان میں محمد باقر قالیباف نے کہا کہ ایران امریکا کی جانب سے بھیجے گئے خط کا جائزہ لے رہا ہے، تاہم واشنگٹن کے ساتھ مذاکرات میں کسی پیشرفت کے لیے تہران کی سات شرائط تسلیم کرنا ضروری ہے۔
انہوں نے کہا کہ ایران اپنی شرائط سے ثالثوں کو کئی مرتبہ آگاہ کر چکا ہے اور امریکا کو بھی ان مطالبات کا علم ہے۔
ان کا کہنا تھا کہ ایران پر دباؤ ڈالنے یا اسے لالچ دینے کی پالیسی کا کوئی اثر نہیں ہوگا۔
محمد باقر قالیباف کے بیان کے مطابق ایران امریکا کے ساتھ مذاکرات کے لیے اپنی شرائط پر قائم ہے اور ان مطالبات کو پورا کیے بغیر بات چیت میں پیشرفت ممکن نہیں۔
واضح رہے کہ ایران نے امریکا کے ساتھ جنگ ختم کرنے اور مذاکرات کے لیے متعدد مطالبات پیش کر رکھے ہیں، جن میں بحری ناکہ بندی کا خاتمہ، بیرون ملک منجمد ایرانی اثاثوں کی بحالی اور لبنان میں اسرائیلی جنگ کا خاتمہ شامل ہیں۔
ایران کا مؤقف ہے کہ امریکا کے ساتھ مذاکرات میں پیشرفت کے لیے اس کے مطالبات کو تسلیم کرنا ضروری ہے، جبکہ ایرانی قیادت اس بات پر زور دے رہی ہے کہ دباؤ کے ذریعے تہران کو اپنے مؤقف سے پیچھے نہیں ہٹایا جا سکتا۔
واضح رہے بدھ کے روز ایرانی وزیر خارجہ عباس عراقچی نے کہا تھا کہ تہران اپنے سات روزہ منصوبے پر عمل درآمد کے لیے ثالثوں کے ساتھ مسلسل رابطے میں ہے اور ایسی تجاویز کا جائزہ لے رہا ہے جن کے ذریعے اس منصوبے پر ایک ہفتے سے بھی کم وقت میں عمل درآمد ممکن ہو سکے۔
عباس عراقچی نے کہا تھا کہ ایران سفارت کاری کو کامیاب ہونے کا ایک اور موقع دے رہا ہے اور مذاکرات کے ذریعے مسائل حل کرنے کی کوشش جاری رکھے ہوئے ہے۔
