کراچی کے علاقے کورنگی میں ڈکیتی کے دوران ہونے والی فائرنگ میں نوجوان جاں بحق ہوگیا۔
واقعہ کے مطابق کورنگی پونے چھ نمبر کے قریب موٹر سائیکل سوار 2 مسلح ملزمان نے میڈیکل اسٹور لوٹنے کی کوشش کی، جس پر اسٹور مالک 24 سالہ صہیب ولد محمد جاوید نے مزاحمت کی۔ مزاحمت پر ملزمان نے فائرنگ کردی، جس سے صہیب کو کندھے پر گولی لگی، جو جان لیوا ثابت ہوئی۔
عینی شاہدین کے مطابق ملزمان نے شناخت چھپانے کے لیے ماسک کا استعمال کیا اور رقم لوٹنے کے بعد وہ فرار ہو گئے، واقعہ کے بعد اطراف کے لوگوں نے شور مچایا، جس پر ملزمان نے ہوائی فائرنگ کی۔
ایس ایس پی کورنگی طارق نواز کے مطابق مقتول صہیب اپنے والدین کا اکلوتا بیٹا تھا اور میڈیکل اسٹور کا مالک تھا۔
انہوں نے بتایا کہ واقعہ کی تفتیش جاری ہے، ملزمان کو جلد گرفتار کرنے کے لیے اسپیشل ٹیم تشکیل دی گئی ہے۔ انہوں نے مزید کہا کہ ڈکیتی کی وارداتوں کی لہر کو روکنے کے لیے فوری اقدامات کیے جا رہے ہیں۔
دوسری جانب عزیز آباد بلاک ٹو میں خاتون نے ڈکیتی کی کوشش ناکام بنا دی۔ خاتون نے ڈاکوؤں کو چکمہ دے کرخود کو بچا لیا۔ واقعہ کی سی سی ٹی وی فوٹیج موصول ہوگئی ہے۔
ادھر محمود آبادعوامی کالونی میں گھر کے اندر نامعلوم افراد کی فائرنگ سے خاتون زخمی ہوگئی۔
