وفاقی وزیر بحری امور جنید انوار چوہدری نے کراچی پورٹ کی کارکردگی پر اطمینان کا اظہار کرتے ہوئے کہا ہے کہ بندرگاہ پر تجارتی سرگرمیاں تیزی سے جاری ہیں اور لاجسٹکس کا شعبہ مستحکم ہو رہا ہے۔
انہوں نے بتایا کہ کراچی پورٹ ٹرسٹ پر 19 جہازوں کی آمد اور ایک جہاز کی روانگی شیڈول ہے، جبکہ اس وقت 14 جہاز لنگر انداز ہیں اور 7 جہاز روانہ ہو چکے ہیں۔ مختلف اشیا کی ترسیل کا عمل بلا تعطل جاری ہے۔
جنید انوار چوہدری کے مطابق گزشتہ 24 گھنٹوں کے دوران مجموعی طور پر 74 ہزار 603 میٹرک ٹن کارگو ہینڈل کی گئی۔ کنٹینرائزڈ کارگو سرِفہرست رہی جس کی مقدار 45 ہزار 171 ٹن رہی۔
انہوں نے مزید بتایا کہ اس عرصے میں درآمدات 19 ہزار 303 ٹن جبکہ برآمدات 25 ہزار 868 ٹن ریکارڈ کی گئیں۔ اسی طرح بلک کارگو 11 ہزار 944 ٹن رہا جبکہ کلنکر کی برآمدات 6 ہزار 114 ٹن تک پہنچ گئیں۔
وزیر بحری امور کا کہنا تھا کہ مائع کارگو کی ہینڈلنگ بھی 10 ہزار 352 ٹن تک پہنچ گئی ہے، جبکہ جہازوں کی مسلسل آمد و رفت پاکستان کی سمندری تجارت میں بہتری کا واضح اشارہ ہے۔
