وفاقی وزیر آئی ٹی شزا فاطمہ خواجہ نے کہا ہے کہ سبسڈی صرف ان گاڑیوں کو ملے گی جو باقاعدہ رجسٹرڈ ہوں گی، اور اس کے لیے ایکسائز ڈیپارٹمنٹ میں رجسٹریشن لازمی قرار دی گئی ہے۔
انہوں نے وزیر مملکت برائے خزانہ بلال اظہر کیانی کے ہمراہ پریس کانفرنس میں بتایا کہ وزارتِ آئی ٹی، وزارتِ خزانہ اور اسٹیٹ بینک باہمی تعاون سے کام کررہے ہیں، جبکہ سبسڈی کی منتقلی کے لیے ڈیجیٹل نظام متعارف کرا دیا گیا ہے۔
ان کا کہنا تھا کہ پیٹرولیم سپلائی چین کو متاثر نہیں ہونے دیا گیا، حکومت مشکل حالات میں عوام کو زیادہ سے زیادہ ریلیف دینے پر توجہ دے رہی ہے۔
وفاقی وزیر کے مطابق وزیراعظم شہباز شریف کی قیادت میں روزانہ کی بنیاد پر صورتحال کی نگرانی کی جا رہی ہے، جبکہ نائب وزیراعظم اسحاق ڈار کی سربراہی میں ایک اسٹیئرنگ کمیٹی فعال ہے، اور عملدرآمد کمیٹی دن میں تین مرتبہ پیشرفت رپورٹ پیش کرتی ہے۔
پیٹرول کی قیمتوں کو قابو میں رکھنے کے لیے 129 ارب روپے خرچ کیے گئے، بلال اظہر کیانی
اس موقع پر وفاقی وزیر مملکت خزانہ بلال اظہر کیانی نے بتایا کہ حکومت نے تین ہفتوں تک پیٹرولیم مصنوعات کی قیمتوں میں اضافہ نہیں کیا۔
ان کے مطابق قیمتوں کو قابو میں رکھنے کے لیے 129 ارب روپے خرچ کیے گئے اور ابتدائی دن سے ہی وزیراعظم کی ہدایت پر عوامی ریلیف کے اقدامات کیے جا رہے ہیں۔
انہوں نے مزید کہاکہ ملک بھر میں پیٹرولیم مصنوعات کی مسلسل فراہمی جاری ہے اور کہیں بھی قلت کا سامنا نہیں۔
ان کا یہ بھی کہنا تھا کہ موٹر سائیکل سواروں کے لیے فی لیٹر 100 روپے سبسڈی دی جا رہی ہے، جبکہ پبلک اور گڈز ٹرانسپورٹ کے لیے بھی خصوصی پیکج متعارف کرایا گیا ہے۔
