مشرق وسطیٰ میں جاری کشیدگی کے خاتمے کے لیے پاکستان بھرپور سفارتی کردار ادا کررہا ہے، جس کا اعتراف سیکریٹری جنرل اقوام متحدہ کی جانب سے بھی کیا جا چکا ہے۔ اس سلسلے میں آج اسلام آباد میں 4 ممالک کے رہنماؤں کی اہم بیٹھک ہونے جارہی ہے۔ مصر اور ترکیہ کے وزرائے خارجہ پاکستان پہنچ چکے ہیں، جبکہ سعودی وزیر خارجہ آج پہنچیں گے۔
گزشتہ رات نائب وزیراعظم و وزیر خارجہ اسحاق ڈار کی ٹیلی فون پر ایران کے وزیر خارجہ عباس عراقچی سے بات ہوئی، جس میں تازہ ترین صورتحال پر تبادلہ خیال کیا گیا۔
مصر اور ترکیہ کے وزرائے خارجہ نے آج اسلام آباد میں وزیر خارجہ اسحاق ڈار سے ملاقات کی، جس میں خطے کی صورت حال پر تبادلہ خیال کیا گیا۔
مشرق وسطیٰ میں قریباً ایک ماہ سے جاری فوجی کشیدگی میں کمی کے حوالے سے چار فریقی اجلاس اور مشاورت کل تک جاری رہے گی۔
گو کہ پاکستان میں یہ چار فریقی اجلاس ہوگا لیکن ایرانی اعلیٰ حکام سے پاکستانی حکام مسلسل رابطے میں ہیں اور گزشتہ رات ہی ایک اہم پیش رفت ہوئی جس کے بارے میں نائب وزیراعظم و وزیر اسحاق ڈار نے اپنے ایکس اکاؤنٹ پر آگاہ کیا کہ ایران نے 20 مزید جہازوں کو آبنائے ہرمز سے گزرنے کی اجازت دے دی ہے۔
اہم بات یہ ہے کہ مذکورہ 20 بحری جہاز پاکستانی پرچم کے ساتھ آبنائے ہرمز سے گزریں گے۔ نائب وزیراعظم و وزیر خارجہ نے اس کو انتہائی مثبت پیش رفت قرار دیا۔
آج چار فریقی بیٹھک کی میزبانی پاکستان کرے گا۔ گزشتہ روز وزیر خارجہ اسحاق ڈار نے بتایا کہ سعودی عرب، ترکیہ اور مصر کے وزرائے خارجہ کل اسلام آباد میں ملیں گے اور اس سے اگلے روز وزیراعظم شہباز شریف سے بھی ملاقات کریں گے۔
انہوں نے بتایا کہ ہماری ملاقات ترکیے میں طے تھی مگر مصروفیات کی وجہ سے میں نے بھائیوں کو اسلام آباد دعوت دی، ہم ایمانداری اور نیک نیتی سے تنازع ختم کرنے کی کوشش کررہے ہیں جس میں تمام دوست ممالک بھی بھرپور تعاون کررہے ہیں۔
اسحاق ڈار نے بتایا کہ ایران سے بات چیت جاری ہے، لیکن مذاکرات کے باعث میڈیا پر بات چیت کرنے سے گریز کررہے ہیں۔
وزیراعظم اور ایرانی صدر کا اہم ٹیلیفونک رابطہ
گزشتہ روز وزیراعظم شہباز شریف اور ایرانی صدر مسعود پزشکیان نے ایک گھنٹے سے زائد ٹیلیفونک رابطہ کیا، جس میں خطے میں جاری کشیدگی اور امن کے فروغ پر تفصیلی تبادلہ خیال ہوا۔
وزیراعظم نے ایران پر اسرائیل کے حالیہ حملوں کی شدید مذمت کی اور ایرانی عوام کے ساتھ پاکستان کی مکمل یکجہتی اور حمایت کا اظہار کیا۔ مرحومین کے لیے دعائیں کی گئیں اور زخمیوں کی صحتیابی کی خواہش ظاہر کی گئی۔
امن مذاکرات اور سفارتی کوششیں
وزیراعظم نے ایران کو اپنی اور دیگر پاکستانی رہنماؤں کی جانب سے امریکا، خلیجی اور اسلامی ممالک کے ساتھ جاری امن مذاکرات کی کوششوں سے آگاہ کیا۔ ایرانی صدر نے پاکستان کی کوششوں کی حمایت کی اور امید ظاہر کی کہ اجتماعی اقدامات سے کشیدگی ختم ہوگی۔
