مصنوعی ذہانت کے ایجنٹس خاموشی سے کاروباری اداروں کے نظام میں سب سے زیادہ فعال اکاؤنٹس میں شامل ہو رہے ہیں، جو لاگ اِن، رسائی کی ترتیبات اور حساس معلومات تک رسائی جیسے کام انجام دے رہے ہیں، حالانکہ وہ کسی انسانی تنظیمی ڈھانچے کا حصہ نہیں ہوتے۔
ماہرین کے مطابق سکیورٹی ٹیمیں جو پہلے صرف انسانی صارفین کے اکاؤنٹس کی نگرانی کے لیے بنائی گئی تھیں، اب ایسے سافٹ ویئر کو بھی کنٹرول کرنے کی ذمہ دار ہیں جو ملازم کی طرح کام کرتا ہے لیکن انسانی رویوں سے مختلف ہوتا ہے
رپورٹ کے مطابق خودکار مصنوعی ذہانت ایجنٹس نئے ڈیجیٹل ملازمین کی شکل اختیار کر رہے ہیں، اس لیے کمپنیوں کو ان کی موجودگی، نگرانی اور مکمل زندگی کے دوران ان کے استعمال کو کنٹرول کرنے کی ضرورت ہے۔
روایتی شناخت اور رسائی کے انتظامی نظام میں صارف کی شناخت اور تصدیق کا عمل محدود اور ایک مرتبہ کی درخواست تک ہوتا تھا، لیکن مصنوعی ذہانت پر مبنی نظام اس طریقہ کار کو تبدیل کر رہے ہیں کیونکہ اب سافٹ ویئر انسانوں کی جانب سے مسلسل مختلف کام انجام دے رہا ہے۔
ماہرین کا کہنا ہے کہ مصنوعی ذہانت ایجنٹس نہ صرف سکیورٹی نظام کے لیے چیلنج بن رہے ہیں بلکہ یہ انسانی صارفین کی رسائی کے انتظام، مسائل کے حل اور سکیورٹی کے عمل میں معاونت بھی کرسکتے ہیں
تاہم اس کے لیے مضبوط حفاظتی اصول ضروری ہیں، کیونکہ مناسب نگرانی کے بغیر تیز رفتاری اور سہولت کے فوائد نئے سکیورٹی خطرات اور کمزوریوں کا باعث بن سکتے ہیں۔
ماہرین کے مطابق انسانی صارفین کے لیے بنائے گئے شناختی نظام کو صرف مشینوں تک وسعت دینا کافی نہیں ہوگا۔ مصنوعی ذہانت پر مبنی کاروباری نظام کے لیے ایسا مشترکہ شناختی نظام درکار ہے جو انسانوں اور مشینوں دونوں کی سرگرمیوں کو محفوظ طریقے سے منظم کرسکے۔
ہر مصنوعی ذہانت ایجنٹ کے لیے ایک واضح انسانی ذمہ دار، مخصوص پالیسیاں، نگرانی کا نظام اور ایسا ریکارڈ ہونا ضروری ہے جس سے معلوم ہو سکے کہ ایجنٹ نے کون سا کام کیا اور اس کی ذمہ داری کس شخص یا ادارے پر عائد ہوتی ہے۔
ماہرین کے مطابق ایجنٹس کو کام مکمل کرنے کے لیے مطلوبہ رسائی دی جانی چاہیے، لیکن پاس ورڈز یا خفیہ معلومات تک براہ راست رسائی خطرات میں اضافہ کر سکتی ہے۔ اس مسئلے کے حل کے لیے ضرورت کے وقت محدود اور عارضی خصوصی رسائی دینے کے نظام کو مؤثر قرار دیا جارہا ہے۔
