انٹرنیشنل کرکٹ کونسل (آئی سی سی) پاکستان کو ٹی20 ورلڈ کپ 2026 میں بھارت کے خلاف میچ کھیلنے پر آمادہ کرنے کی کوششیں کررہا ہے۔
اس سلسلے میں لاہور میں آئی سی سی کے ڈپٹی چیئرمین عمران خواجہ اور پاکستان کرکٹ بورڈ (پی سی بی) کے چیئرمین محسن نقوی کے درمیان مذاکرات جاری ہیں۔ مذاکرات میں بنگلہ دیش کرکٹ بورڈ کے صدر امین الاسلام بھی شریک ہیں۔
میڈیا رپورٹس کے مطابق ملاقات میں چیئرمین پی سی بی نے اپنا فوکس بنگلہ دیش کے ساتھ ہونے والی زیادتی کے ازالے پر رکھا ہے۔
محسن نقوی نے عمران خواجہ کو واضح طور پر کہاکہ بھارت کے خلاف میچ نہ کھیلنے کا فیصلہ حکومت پاکستان کا ہے اور اس میچ کے انعقاد یا منسوخی کا حتمی اختیار بھی حکومت ہی کے پاس ہے۔
ملاقات کے دوران بنگلہ دیش کرکٹ بورڈ کے صدر امین الاسلام نے پاکستان کی طرف سے اظہار یکجہتی اور حمایت پر شکریہ ادا کیا۔
یاد رہے کہ پاکستان نے ورلڈ کپ میں بھارت کے خلاف میچ نہ کھیلنے کا اعلان اس لیے کیا کہ وہ بنگلا دیش کے مؤقف کی حمایت کرتا ہے، جس نے سیکیورٹی خدشات کے باعث اپنے میچز سری لنکا منتقل کرنے کی درخواست دی تھی۔
آئی سی سی نے اس درخواست کو مسترد کردیا اور بنگلہ دیش کی جگہ اسکاٹ لینڈ کو ایونٹ میں شامل کیا۔
جوابی اقدام کے طور پر پاکستان نے 15 فروری کو بھارت کے ساتھ شیڈول میچ کھیلنے سے انکار کردیا۔
اگر پاکستان اور بھارت کے درمیان یہ میچ نہ ہوا تو آئی سی سی کو مالی طور پر بھاری نقصان کا سامنا کرنا پڑے گا۔
اسی تناظر میں سری لنکا نے بھی پاکستان سے درخواست کی ہے کہ وہ اپنے فیصلے پر نظر ثانی کرے، کیوں کہ سری لنکا کو بھی اس فیصلے سے مالی نقصان کا خدشہ ہے۔
دوسری جانب اماراتی کرکٹ بورڈ نے بھی پاکستان سے اپنے فیصلے پر نظرِ ثانی کی درخواست کردی ہے۔
اماراتی کرکٹ بورڈ نے پاکستان کرکٹ بورڈ سے باضابطہ رابطہ کیا ہے اور 15 فروری کو بھارت کے خلاف میچ نہ کھیلنے کے فیصلے پر دوبارہ غور کرنے پر زور دیا ہے۔
میڈیا رپورٹس کے مطابق چیئرمین پی سی بی آئندہ ایک سے دو روز میں وزیراعظم شہباز شریف سے ملاقات کریں گے، جس میں بھارت کے خلاف میچ کھیلنے سے متعلق حتمی فیصلہ کیا جائےگا۔
