پاکستان کے وفاقی وزیر برائے موسمیاتی تبدیلی ڈاکٹر مصدق ملک نے کہا ہے کہ پاکستان اور بھارت کے درمیان بامعنی مکالمے کے لیے دونوں ممالک کی الگ قومی شناخت اور خودمختاری کو تسلیم کرنا ضروری ہے۔
نئی دہلی میں شنگھائی تعاون تنظیم (ایس سی او) کے پہلے تہذیبی مکالمے کے فورم کے موقع پر بھارتی میڈیا سے گفتگو کرتے ہوئے مصدق ملک کا کہنا تھا کہ حقیقی مکالمہ دو مختلف شناخت رکھنے والی قوموں کے درمیان ہوتا ہے، جبکہ یکسانیت کا تصور مکالمے کے بجائے یک طرفہ گفتگو کو جنم دیتا ہے۔
بھارتی دارالحکومت نئی دہلی میں یہ تین روزہ فورم 20 سے 22 نومبر تک تاریخی مقام پرانا قلعہ میں منعقد کیا جا رہا ہے، جس کا افتتاح بھارتی وزیراعظم نریندر مودی نے کیا۔ پاکستان کی نمائندگی وفاقی وزیر مصدق ملک کر رہے ہیں۔
یہ گزشتہ تین سال سے زائد عرصے میں کسی پاکستانی وفاقی وزیر کا بھارت کا پہلا دورہ ہے۔ اس سے قبل مئی 2023 میں اُس وقت کے وزیر خارجہ بلاول بھٹو زرداری نے بھارت میں ہونے والے ایس سی او اجلاس میں شرکت کی تھی۔



































