سندھ کے شہر پنوعاقل میں بینظیر انکم سپورٹ پروگرام کے تحت مستحق خواتین کی امدادی رقم سے غیر قانونی کٹوتی کی شکایات پر پولیس نے کارروائی کرتے ہوئے ایک ڈیوائس ہولڈر ایجنٹ کو گرفتار کر لیا ہے۔
پولیس کے مطابق گرفتار کیے جانے والے ملزم کی شناخت محمد اسلم انڈھڑ کے نام سے ہوئی ہے، جس کے قبضے سے ایک بائیومیٹرک ڈیوائس، موبائل فونز اور 2 لاکھ 30 ہزار روپے نقد برآمد کیے گئے ہیں۔
پولیس نے ملزم کے خلاف باضابطہ طور پر مقدمہ درج کر کے مزید تفتیش کا آغاز کر دیا ہے۔
واقعے پر ردعمل ظاہر کرتے ہوئے ایس ایس پی سکھر احمد چوہدری نے واضح کیا ہے کہ بینظیر انکم سپورٹ پروگرام کے تحت ملنے والی امدادی رقم غریب اور مستحق خواتین کا حق ہے اور اس میں غیر قانونی کٹوتی یا خوردبرد کرنے والے عناصر کے ساتھ کسی قسم کی کوئی رعایت نہیں برتی جائے گی۔
ضلعی انتظامیہ اور پولیس کی جانب سے اس عزم کا اعادہ کیا گیا ہے کہ امدادی رقوم کی تقسیم کے عمل کو شفاف بنانے اور غریب شہریوں کے حقوق سلب کرنے والوں کے خلاف سخت قانونی کارروائیوں کا سلسلہ جاری رکھا جائے گا۔
شکایت کیسے درج کرائیں؟
ترجمان بینظیر انکم سپورٹ پروگرام کے مطابق اس طرح کے غیر قانونی اقدامات یا کٹوتیوں کی روک تھام کے لیے متاثرہ خواتین اور شہری فوری طور پر اپنے قریبی بی آئی ایس پی تحصیل آفس سے رجوع کر سکتے ہیں جہاں اسسٹنٹ ڈائریکٹر یا ذمہ دار افسر کو شکایت فارم کے ذریعے تفصیلات فراہم کی جا سکتی ہیں۔
اس کے علاوہ پروگرام کے آفیشل آن لائن پورٹل پر شناختی کارڈ یا فارم نمبر اور موبائل نمبر درج کر کے بھی شکایات درج کرائی جا سکتی ہیں، جبکہ کسی بھی دشواری کی صورت میں سرکاری ہیلپ لائن نمبر 0800-26477 پر کال کر کے مدد حاصل کی جا سکتی ہے۔
حکام کا کہنا ہے کہ موصول ہونے والی شکایات کی جانچ پڑتال کے بعد ثبوت درست ثابت ہونے پر متعلقہ ایجنٹوں کے خلاف سخت قانونی کارروائی عمل میں لائی جاتی ہے اور کٹی ہوئی رقوم متاثرہ افراد کو واپس دلائی جاتی ہیں۔
