شارجہ کے نائب حکمران عزت مآب شیخ ڈاکٹر سلطان بن احمد القاسمی اور شارجہ بک اتھارٹی کی چیئرپرسن عزت مآب شیخہ بدور بنت سلطان القاسمی نے 45ویں شارجہ بین الاقوامی کتاب میلے میں مختلف پویلینز کا دورہ کیا اور نمائش میں شریک اداروں، سرکاری محکموں اور پبلشرز کی سرگرمیوں کا جائزہ لیا۔شارجہ ایکسپو سینٹر میں 4 سے 15 نومبر تک جاری رہنے والے 12 روزہ کتاب میلے میں 126 ممالک کے 3 ہزار 212 ناشرین اور نمائش کنندگان شرکت کر رہے ہیں۔
دورے کا آغاز سلطنت عمان کے پویلین سے ہوا، جو رواں سال میلے کا مہمانِ اعزاز ہے۔ اس موقع پر دونوں شخصیات کو عمان کی شرکت، نمایاں ثقافتی اور تاریخی اشاعتوں اور ملک کی روایات و رسم و رواج کی عکاسی کرنے والی کتابوں کے بارے میں تفصیلی بریفنگ دی گئی۔ انہیں میلے کے دوران عمان کی جانب سے منعقد کی جانے والی مختلف ثقافتی سرگرمیوں سے بھی آگاہ کیا گیا۔
شارجہ پولیس کے پویلین میں انہیں ‘مستقبل کا مصنف’ کے عنوان سے شروع کیے گئے اقدام کے بارے میں بتایا گیا، جس کا مقصد نوجوانوں میں ادبی صلاحیتوں کو تلاش کرنا اور انہیں تخلیقی تحریر کی تربیت فراہم کرنا ہے۔ اس پروگرام کے ذریعے نوجوانوں کو بامقصد کہانیاں لکھنے، تخلیقی صلاحیتیں نکھارنے اور مثبت اقدار کو فروغ دینے کی ترغیب دی جاتی ہے۔ اس اقدام کے تحت اب تک تین کہانیوں کو کامیاب قرار دیا گیا ہے۔دونوں شخصیات نے مصنوعی ذہانت پر مبنی ‘اسمارٹ اڈاپٹو لرننگ’ پلیٹ فارم کا بھی جائزہ لیا۔ یہ نظام طلبہ کی کارکردگی کا تجزیہ کرکے ان کی تعلیمی سطح اور صلاحیتوں کی نشاندہی کرتا ہے اور ہر طالب علم کی ضروریات کے مطابق اسباق، مشقیں اور امتحانات ترتیب دیتا ہے۔دورے کے دوران انہوں نے وزارت ثقافت، نیشنل میڈیا اتھارٹی، شارجہ آئیڈینٹیٹی پلیٹ فارم، شارجہ براڈکاسٹنگ اتھارٹی، امارات پبلشرز ایسوسی ایشن اور بیت الحکمہ کے پویلینز کا بھی معائنہ کیا۔اس کے علاوہ حمدان بن محمد ہیریٹیج سینٹر، امارات ریپروگرافک رائٹس مینجمنٹ ایسوسی ایشن، امریکن یونیورسٹی آف شارجہ اور جامعہ شارجہ کے پویلینز کا بھی دورہ کیا گیا۔
شیخ ڈاکٹر سلطان بن احمد القاسمی اور شیخہ بدور بنت سلطان القاسمی نے امارات رائٹرز یونین، شارجہ انسٹی ٹیوٹ فار ہیریٹیج، مملکت بحرین اور ریاست کویت کے پویلینز کے علاوہ القاسمی پبلیکیشنز اور امارات کونسل فار بکس فار ینگ پیپل کی سرگرمیوں کا بھی جائزہ لیا۔عدالتی کونسل کے پویلین میں دونوں شخصیات کو شارجہ انسٹی ٹیوٹ برائے عدالتی علوم کی تازہ اشاعتوں سے متعارف کرایا گیا۔ ان میں عائلی قوانین کا بریل رسم الخط میں تیار کردہ خصوصی ایڈیشن بھی شامل ہے، جو بینائی سے محروم قانون کے طلبہ کے لیے تیار کیا گیا ہے۔اس موقع پر عدالتی محکمہ اور استغاثہ عامہ کے نئے اقدامات، اشاعتوں اور ‘اثر’ جیسے علمی منصوبوں کے بارے میں بھی بریفنگ دی گئی۔رواں سال شارجہ بین الاقوامی کتاب میلے میں مختلف زبانوں کی 17 لاکھ سے زائد کتابیں پیش کی جا رہی ہیں، جن میں ادب، فکر، سائنس اور بچوں کی کتابوں سمیت متعدد موضوعات شامل ہیں۔ میلے میں عرب اور بین الاقوامی ناشرین کے ساتھ سرکاری ادارے اور محکمے بھی اپنی تازہ اشاعتیں اور ثقافتی اقدامات متعارف کرا رہے ہیں۔
