پاکستان ٹیلی کمیونی کیشن اتھارٹی (پی ٹی اے) نے غیر فعال موبائل سمز سے منسلک واٹس ایپ اکاؤنٹس بلاک کرنے کا عمل شروع کردیا ہے۔ اس اقدام کا مقصد صارفین کے اکاؤنٹس کو ممکنہ غلط استعمال اور غیر مجاز رسائی سے محفوظ رکھنا ہے۔ پی ٹی اے نے صارفین کو ہدایت کی ہے کہ وہ اپنے واٹس ایپ اکاؤنٹس ایسے موبائل نمبروں سے منسلک رکھیں جو فعال ہوں اور ان کے زیرِ استعمال ہوں۔
پی ٹی اے حکام کے مطابق یہ کارروائی صارفین کو آگاہی مہم کے ذریعے خبردار کرنے کے بعد شروع کی گئی ہے۔ اتھارٹی نے پہلے ہی صارفین کو ہدایت کی تھی کہ وہ اپنے واٹس ایپ اکاؤنٹس ایسے موبائل نمبروں سے منسلک رکھیں جو فعال ہوں اور ان کے اپنے استعمال میں ہوں، تاکہ انہیں اکاؤنٹس تک رسائی برقرار رکھنے میں مشکلات کا سامنا نہ کرنا پڑے۔
پی ٹی اے نے واضح کیا ہے کہ غیر فعال یا منسوخ شدہ موبائل نمبرز ٹیلی کام کمپنیوں کی جانب سے مقررہ طریقہ کار کے تحت کسی دوسرے صارف کو جاری کیے جاسکتے ہیں۔ ایسی صورت میں پرانے نمبر کے مالک کے واٹس ایپ اکاؤنٹ کے غلط استعمال یا اس تک غیر مجاز رسائی کا خدشہ پیدا ہوسکتا ہے۔
مثال کے طور پر، اگر کوئی شخص اپنا موبائل نمبر استعمال کرنا چھوڑ دے یا اس کی سم غیر فعال ہوجائے اور بعد میں وہی نمبر کسی دوسرے شخص کو جاری کردیا جائے تو پرانے نمبر سے منسلک واٹس ایپ اکاؤنٹ کی سیکیورٹی کے مسائل پیدا ہوسکتے ہیں۔ اسی خطرے کو کم کرنے کے لیے پی ٹی اے نے صارفین کو اپنے موبائل نمبرز اور واٹس ایپ اکاؤنٹس کی موجودہ حیثیت کا جائزہ لینے کی ہدایت کی ہے۔
پی ٹی اے نے صارفین کو مشورہ دیا ہے کہ وہ اپنی سمز کی موجودہ حیثیت کی تصدیق کریں اور اگر ان کا موبائل نمبر بند ہوچکا ہے یا وہ اسے استعمال نہیں کررہے تو اپنے واٹس ایپ اکاؤنٹ کو کسی فعال نمبر پر منتقل کرلیں۔
جن صارفین نے اپنا موبائل نمبر تبدیل کرلیا ہے، انہیں واٹس ایپ میں موجود ’چینج نمبر‘ کا فیچر استعمال کرنے کی ہدایت کی گئی ہے۔ اس سہولت کے ذریعے صارفین اپنا موجودہ اکاؤنٹ نئے فعال نمبر پر منتقل کرسکتے ہیں، جس سے اکاؤنٹ تک رسائی برقرار رکھنے اور پرانے نمبر سے پیدا ہونے والے ممکنہ مسائل سے بچنے میں مدد مل سکتی ہے۔
پی ٹی اے کے مطابق موبائل نمبر تبدیل کرنے یا سم کا استعمال ترک کرنے کی صورت میں بروقت اقدامات کرنا ضروری ہے تاکہ صارفین کو اپنے واٹس ایپ اکاؤنٹس تک رسائی برقرار رکھنے میں مشکلات کا سامنا نہ کرنا پڑے۔ صارفین کو چاہیے کہ وہ اپنے اکاؤنٹس سے منسلک نمبروں کی جانچ کریں اور اس بات کو یقینی بنائیں کہ ان کے زیرِ استعمال نمبر فعال اور ان کے کنٹرول میں ہیں۔
