ایران کے خلاف جنگ پر امریکی فوج کے اخراجات 47 ارب ڈالر سے تجاوز کرگئے، جو جولائی میں محکمہ دفاع کے تخمینے سے 25 فیصد سے بھی زیادہ ہیں۔
خبر رساں ادارے رائٹرز کے مطابق پینٹاگون کے اعداد و شمار سے ظاہر ہوتا ہے کہ جنگ میں استعمال ہونے والے اسلحے کی جگہ نئے ہتھیار خریدنے کے لیے 29 ارب ڈالر سے زائد جبکہ تباہ یا ضائع ہونے والے فوجی سازوسامان، طیاروں اور ڈرونز کی جگہ لینے کے لیے 6 ارب ڈالر سے زیادہ درکار ہوں گے۔
رپورٹ کے مطابق امریکی وزیر دفاع پیٹ ہیگسیتھ نے جولائی میں جنگ کے اخراجات کا تخمینہ 37 ارب 50 کروڑ ڈالر لگایا تھا۔ پینٹاگون نے تازہ تخمینے کو تاحال عوامی سطح پر جاری نہیں کیا اور رائٹرز کی جانب سے تبصرے کی درخواست پر فوری ردعمل بھی نہیں دیا۔
رائٹرز کے مطابق امریکی فوجی اڈوں کو ایرانی میزائلوں اور ڈرون حملوں سے پہنچنے والے نقصان کی مرمت کے اخراجات تازہ تخمینے میں واضح طور پر شامل نہیں، جس کے باعث جنگ کا مجموعی مالی بوجھ مزید بڑھ سکتا ہے۔
رپورٹ میں کہا گیا ہے کہ جنگ کے باعث عالمی توانائی کی قیمتوں میں اضافے نے امریکی معیشت اور صدر ڈونلڈ ٹرمپ کی جماعت ری پبلکن پارٹی کے لیے سیاسی مشکلات بھی بڑھا دی ہیں۔ امریکا میں 3 نومبر کو ہونے والے وسط مدتی انتخابات سے قبل جنگ کے معاشی اثرات اہم موضوع بنے ہوئے ہیں۔
