ایران کے خلاف کسی بھی فوجی کارروائی کا خمیازہ امریکا کو بھگتنا ہوگا، نئی جنگ مسلط کی گئی تو پہلے سے زیادہ طاقت کے ساتھ جواب دیں گے۔
سربراہ ایرانی سپریم نیشنل سکیورٹی کونسل محسن رضائی نے خبردار کیا ہے کہ خطے میں نئی جنگ کی صورت میں امریکی فوجیوں کی ہلاکتوں میں دس گنا اضافہ ہوسکتا ہے۔
ایرانی میڈیا کو انٹرویو دیتے ہوئے محسن رضائی نے کہا کہ ایران سفارت کاری کو ترجیح دیتا ہے، تاہم اگر جنگ شروع کی گئی تو ایران کے پاس مسلسل جوابی حملے کرنے کے لیے ضروری وسائل موجود ہیں۔
انہوں نے کہا کہ ایران نے ابھی اپنی تمام تر صلاحیتیں استعمال نہیں کیں اور وہ جنگ کے اگلے مرحلے کے لیے بھی تیار ہے۔
محسن رضائی کے مطابق امریکا کو ایران کے خلاف کسی بھی نئی کارروائی کے نتائج بھگتنا پڑیں گے اور ایران اس کا جواب پہلے سے زیادہ طاقت کے ساتھ دے گا۔
محسن رضائی نے الزام عائد کیا کہ امریکی صدر ڈونلڈ ٹرمپ نے جنگ ختم کرنے سے متعلق ایران کی تجویز کو التوا میں ڈال دیا ہے، جس کے باعث مذاکرات رک گئے ہیں۔
ان کا کہنا تھا کہ صدر ٹرمپ کے پاس ایران کے ساتھ جنگ ختم کرنے کے لیے کوئی واضح اور عملی منصوبہ موجود نہیں، اور یہی صورت حال سفارتی تعطل کا سبب بنی ہے۔
ایرانی عہدیدار نے ایک بار پھر واضح کیا کہ ایران جنگ نہیں بلکہ سفارت کاری کو ترجیح دیتا ہے، تاہم اگر اس کے خلاف نئی جنگ شروع کی گئی تو وہ بھرپور جواب دینے کے لیے تیار ہے۔
محسن رضائی نے امریکی فوجیوں کی ممکنہ ہلاکتوں میں دس گنا اضافے سے متعلق بیان دے کر واشنگٹن کو خبردار کیا ہے کہ ایران کے خلاف کسی بھی فوجی کارروائی کے سنگین نتائج برآمد ہوسکتے ہیں۔
