کراچی سے پشاور جانے والی رحمان بابا ایکسپریس ملتان کے قریب حادثے کا شکار ہوگئی، جس کے نتیجے میں 4 مسافر جاں بحق اور 30 سے زائد زخمی ہوگئے۔
شیر شاہ پل کے قریب پیش آنیوالے اس حادثے میں ٹرین کی تمام 14 بوگیاں پٹڑی سے اتر گئیں، جبکہ متعدد مسافر بوگیوں میں پھنس گئے، جنہیں نکالنے کے لیے ریسکیو آپریشن جاری ہے۔
حادثے کے بعد جائے وقوع پر خوف و ہراس پھیل گیا اور متاثرہ بوگیوں سے چیخ و پکار کی آوازیں سنائی دیتی رہیں۔
ریسکیو ٹیموں نے امدادی کارروائیاں شروع کرتے ہوئے مسافروں کو نکالنے اور زخمیوں کو طبی امداد فراہم کرنے کا عمل شروع کردیا۔
حکام کے مطابق زخمیوں کو ابتدائی طبی امداد دینے کے بعد نشتر اسپتال منتقل کیا جارہا ہے، جبکہ امدادی کارروائیوں میں معاونت کے لیے ریلیف ٹرین بھی جائے حادثہ پر پہنچ گئی ہے۔
حادثے کے باعث اپ ٹریک پر ٹرینوں کی آمدورفت معطل ہوگئی، جبکہ متاثرہ مسافر اپنا سامان لے کر ریلوے ٹریک کے کنارے موجود ہیں۔
دوسری جانب وزیراعظم شہباز شریف نے رحمان بابا ایکسپریس حادثے کا نوٹس لیتے ہوئے زخمیوں سے اظہارِ افسوس کیا ہے۔
وزیراعظم نے متعلقہ حکام کو ہدایت کی ہے کہ زخمیوں کو فوری اور بہترین طبی سہولیات فراہم کی جائیں۔
