ایم اے جناح روڈ پر واقع کے ایم سی کی عمارت میں آتشزدگی کے باعث میئر کراچی کا دفتر مکمل طور پر جل گیا۔کے ایم سی ہیڈ آفس میں لگنے والی آگ پر 3 فائر ٹینڈرز نے قابو پا لیا۔فائر بریگیڈ حکام کے مطابق آگ میئر کراچی کے دفتر سے متصل کچن میں لگی تھی، آتشزدگی کے نتیجے میں میئر کراچی کا دفتر بھی مکمل جل گیا۔حکام کے مطابق آتشزدگی کے دوران کسی قسم کا کوئی جانی نقصان نہیں ہوا، فوری طور پر وجوہات معلوم نہ ہو سکیں۔واضح رہے کہ گزشتہ روز لانڈھی پروسیسنگ زون میں واقع کپڑے کی فیکٹری میں خوفناک آتشزدگی کے دوران سامان جل کر خاکستر ہوگیا تھا۔

میئر کراچی مرتضیٰ وہاب کا کہنا ہے کہ آگ اچانک لگتی ہے یا لگائی جاتی ہے اصل وجوہات کا تحقیقات کے بعد ہی پتہ چلے گا۔ میئر کراچی نے میڈیا سے گفتگو کرتے ہوئے کہا کہ آگ اچانک ہی لگتی ہے، یا لگائی جاتی ہے ۔چیف فائر آفیسر کو اس پورے معاملے کی تحقیقات کا ٹاسک دے دیا گیا ہے ۔ آگ لگنے کی اصل وجوہات کا پتہ تحقیقات کے بعد ہی چلے گا۔مرتضیٰ وہاب نے بتایا کہ آتشزدگی کی وجہ سے میرا کمرہ جل گیا ہے ، لیکن میرے پاس کوئی بھی فائل دستخط شدہ نہیں ہوتی۔ میرے دستخط کے بعد فائلیں متعلقہ افسران کے دفاتر تک پہنچا دی جاتی ہیں۔ اب یہ الزام نہ لگایا جائے کہ کوئی ریکارڈ جل گیا۔ان کا کہنا تھا کہ کوئی ایسا نہ سوچے کہ میں کام نہیں کروں گا، میں شہر میں نکلوں گا اور عارضی آفس میں بیٹھوں گا