شہریوں کو پاسپورٹس کے حصول میں سہولت فراہم کرنے کے لیے محکمہ پاسپورٹس نے ملک بھر میں پاسپورٹ ڈیلیوری کاؤنٹرز ہر ہفتے کے روز بھی کھلے رکھنے کا اعلان کردیا۔
محکمہ پاسپورٹس کے جاری کردہ اعلامیے کے مطابق ملک بھر کے پاسپورٹ ڈیلیوری کاؤنٹرز ہفتہ کے روز صبح 8 بجے سے شام 4 بجے تک شہریوں کو خدمات فراہم کریں گے۔
اعلامیے کے مطابق شہری معمول کے ورکنگ ڈیز کے علاوہ ہفتہ کے روز بھی اپنے تیار شدہ پاسپورٹس متعلقہ ڈیلیوری کاؤنٹرز سے وصول کرسکیں گے۔
اس اقدام کا مقصد شہریوں کو اضافی سہولت فراہم کرنا اور پاسپورٹس کی بروقت وصولی کو یقینی بنانا ہے، خصوصاً ان افراد کے لیے جو مصروفیات یا دیگر وجوہات کے باعث ہفتے کے دوران پاسپورٹ وصول نہیں کرپاتے۔
محکمہ پاسپورٹس نے شہریوں کو ہدایت کی ہے کہ وہ اپنے تیار پاسپورٹس مقررہ مدت کے اندر وصول کرلیں۔
اعلامیے میں واضح کیا گیا ہے کہ ایسے پاسپورٹس جو 6 ماہ سے زائد عرصے تک وصول نہیں کیے جائیں گے، انہیں حکومتی پالیسی کے تحت تلف کردیا جائے گا۔
پاسپورٹ کے حصول اور اس کی بروقت ڈیلیوری شہریوں کے لیے اہم انتظامی ضرورت ہے، تاہم، شہریوں کو یہ بھی یقینی بنانا ہوگا کہ تیار پاسپورٹ مقررہ مدت میں وصول کرلیا جائے۔
دوسری صورت میں 6 ماہ سے زائد عرصے تک وصول نہ ہونے والے پاسپورٹس حکومتی پالیسی کے مطابق تلف کیے جاسکتے ہیں۔
