جماعت اسلامی پاکستان کے امیر حافظ نعیم الرحمان نے کہا ہے کہ پیٹرولیم لیوی کے خلاف آج پورے ملک میں تاریخی ہڑتال ہوگی، جس کے بعد آئندہ کا لائحہ عمل دیں گے اور مسئلہ حل نہ ہوا تو حکومت گراؤ تحریک چلائیں گے۔
مال روڈ لاہور میں جاری دھرنے سے خطاب کرتے ہوئے امیر جماعت اسلامی حافظ نعیم الرحمان نے کہا کہ کراچی کی تمام مارکیٹوں کی تنظیموں نے ہڑتال کی حمایت کی ہے، لاہور کے تاجروں نے بھی حمایت کی ہے اور کل تمام مارکیٹیں بند ہوں گی۔
ان کا کہنا تھا کہ جنوبی پنجاب میں بھی بڑے بڑے احتجاجی کیمپ لگے ہیں اور ہرگزرتے دن کے ساتھ عوام کی حمایت بڑھ رہی ہے۔
حافظ نعیم الرحمان نے کہا کہ لیوی بھتہ، بجلی کے فکسڈ چارجز سے ہر کوئی پریشان ہے، راولپنڈی، اسلام آباد، کراچی کی تمام مارکیٹیں بند ہوں گی، ہمارا ذاتی مسئلہ نہیں ہے بلکہ عوام کے حقوق کے لیے نکلے ہیں۔
حکومت پر تنقید کرتے ہوئے انہوں نے کہا کہ ایک طرف یہ کہتے ہیں آئی ایم ایف کی وجہ سے لیوی ختم نہیں کر سکتے اور حکمران طبقہ ہر مرتبہ کہتا ہے آئی ایم ایف آخری پروگرام ہو گا لیکن ہر حکومت عوام کو آئی ایم ایف کی دلدل میں پھنسا دیتی ہے۔
انہوں نے کہا کہ ہمارے قائدین عوام، تاجروں سے رابطے میں ہیں، پشاور میں اس وقت چار مقامات پر دھرنے چل رہے ہیں، چترال، سکھر اور سندھ کے کئی مقامات پر بھی دھرنے جاری ہیں۔
امیر جماعت اسلامی نے کہا کہ بینکوں کا مافیا چینی، آٹا، آئی پی پیز مافیا کے ساتھ ملا ہوتا ہے، آئی پی پیز کے قرضوں کا سود بھی عوام ادا کرتے ہیں، آئی پی پیز نے جو عوام کے پیسوں سے کمایا اس کا انکم ٹیکس بھی جمع نہیں کروایا۔
حافظ نعیم الرحمان نے کہا کہ کل پورے ملک میں تاریخی ہڑتال ہو گی، لوگ ہڑتال کر رہے ہیں لیکن مسلم لیگ (ن) نے دھندہ شروع کر دیا، ایک طرف مذاکرات کرتے ہیں، دوسری جانب زبردستی کرتے ہیں۔
ان کا کہنا تھا کہ رات کو گرفتاریاں بھی ہو سکتی ہیں، جتنے ظلم کر سکتے ہو کر لو، ہڑتال ضرور ہو گی، جماعت اسلامی پرامن سیاسی مزاحمت پر یقین رکھتی ہے، حکومت ہوش کے ناخن لے، تاجروں پر دباؤ نہ ڈالے۔
انہوں نے کہا کہ کل ہڑتال کے بعد آئندہ کے لائحہ عمل کا اعلان کریں گے، راولپنڈی والے تیاری کر لیں، وہاں بھی دھرنا شروع ہوگا، جن اضلاع میں ابھی دھرنے نہیں ہوئے وہاں بھی شروع کریں گے، ہم حق کے ساتھ ہیں، لانگ مارچ کے لیے اپوزیشن سے بھی مشورہ کریں گے۔
دھرنے کے شرکا سے خطاب میں حافظ نعیم الرحمان نے کہا کہ اسلام آباد لانگ مارچ کے لیے پوری قیادت بھی کارکنوں کے ساتھ ہوگی، عوام کو اکٹھا کر کے ملک بھر میں پیدل لانگ مارچ شروع کریں گے، چاروں اطراف سے لاکھوں کی تعداد میں اسلام آباد پہنچیں گے۔
امیر جماعت اسلامی نے کہا کہ اگر پھر بھی مسئلہ حل نہ ہوا تو حکومت گراؤ تحریک چلائیں گے۔
