دبئی, پاکستان کے موجودہ سیاسی، آئینی اور سماجی حالات کے تناظر میں معروف قانون دان محمد اظہر صدیق، ایڈووکیٹ سپریم کورٹ آف پاکستان اور ملک یاسر امتیاز اعوان کے درمیان دبئی میں ایک اہم ملاقات ہوئی۔ ملاقات میں پاکستان کے سماجی و سیاسی منظرنامے، ملکی سیاست کو درپیش داخلی و خارجی چیلنجز پر گفتگو ہوئی. ملاقات کے دوران پاکستان کے موجودہ سماجی و سیاسی حالات کا جامع جائزہ لیا گیا۔ گفتگو میں اس امر پر تشویش کا اظہار کیا گیا کہ مسلسل سیاسی کشمکش، ادارہ جاتی تناؤ، معاشی دباؤ اور عوامی سطح پر بڑھتی ہوئی سیاسی تقسیم نے ملک کے مجموعی استحکام کو متاثر کیا ہے۔
اس بات پر بھی تفصیلی گفتگو ہوئی کہ پاکستان کو ایک ایسے سیاسی ماحول کی ضرورت ہے جہاں اختلافِ رائے کو جمہوری عمل کا حصہ سمجھا جائے اور سیاسی اختلافات کا حل طاقت، انتقام یا تصادم کے بجائے آئین، قانون، پارلیمانی عمل اور سیاسی مکالمے کے ذریعے تلاش کیا جائے۔ملک یاسر امتیاز اعوان اور اظہر صدیق کے درمیان اس امر پر بھی تبادلۂ خیال ہوا کہ ریاستی اداروں، سیاسی جماعتوں اور عوام کے درمیان اعتماد کی بحالی پاکستان کے مستقبل کے لیے بنیادی اہمیت رکھتی ہے۔ ملاقات میں اس نکتے پر بھی گفتگو ہوئی کہ کسی بھی سیاسی جماعت کی طویل المدتی کامیابی کے لیے مقبولیت کے ساتھ ساتھ مضبوط تنظیم، واضح سیاسی وژن، قانونی جدوجہد، سیاسی حکمتِ عملی اور عوام کے ساتھ مسلسل رابطہ ضروری ہے۔ملاقات میں اس اصول پر خصوصی زور دیا گیا کہ پاکستان میں کسی بھی سیاسی بحران کا مستقل حل آئین کی بالادستی اور قانون کی حکمرانی کے بغیر ممکن نہیں.
اسی تناظر میں ملاقات کے دوران اس بات پر زور دیا گیا کہ سیاسی اختلاف رکھنے والے ہر فرد کو منصفانہ قانونی عمل، مؤثر عدالتی چارہ جوئی اور آئین میں فراہم کردہ بنیادی حقوق تک رسائی حاصل ہونی چاہیے۔
