وفاقی وزیر مذہبی امور سردار محمد یوسف نے کہا ہے کہ وزارت مذہبی امور کے زیر اہتمام قومی سیرت النبی ﷺ کانفرنس 1448ھ، 2026 کل 12 ربیع الاول کو منعقد ہوگی۔ بین الاقوامی سیرت النبی ﷺ کانفرنس میں ممتاز علما، مشائخ، دانشور، محققین اور دیگر شخصیات شرکت کریں گی۔
وفاقی وزیر کے مطابق رواں سال مقابلۂ مقالاتِ سیرت کا موضوع ’نسل نو کا تحفظ، تعمیر اور کردار سیرت النبی ﷺ کی روشنی میں‘ مقرر کیا گیا تھا۔ موضوع پر بہترین مقالات پیش کرنے والوں میں نقد انعامات اور سرٹیفکیٹس تقسیم کیے جائیں گے، جبکہ کانفرنس کے موقع پر جید علما اور سکالرز سیرت النبی ﷺ کے مختلف پہلوؤں پر اظہار خیال کریں گے۔
انہوں نے کہا کہ کانفرنس میں نوجوان نسل کو درپیش فکری، اخلاقی اور سماجی چیلنجز کا جائزہ لیا جائے گا۔ سیرت النبی ﷺ نوجوان نسل کے لیے کردار سازی اور مثبت طرز زندگی اپنانے کی مضبوط بنیاد فراہم کرتی ہے۔
وزارت مذہبی امور کی جانب سے سیرت النبی ﷺ کے فروغ کے لیے ملک گیر سرگرمیوں کا بھی اہتمام کیا جا رہا ہے۔ آج 11 ربیع الاول کو محفلِ نعت رسولِ مقبول ﷺ منعقد ہوگی، جبکہ قومی سیرت النبی ﷺ پروگرام کے تحت ملک بھر میں کانفرنسز، سیمینارز، محافلِ نعت اور تعلیمی سرگرمیوں کی حوصلہ افزائی کی جا رہی ہے۔
اس کے علاوہ قرآن و سیرت نمائش، سیرت کے مقابلوں اور دیگر علمی و ادبی سرگرمیوں کا انعقاد بھی کیا جائے گا۔ ڈیجیٹل اور سوشل میڈیا کے ذریعے سیرت النبی ﷺ کا مستند اور مثبت پیغام عام کرنے پر بھی خصوصی توجہ دی جا رہی ہے۔
سردار محمد یوسف نے کہا کہ سیرت النبی ﷺ کا فروغ کسی ایک ادارے کی نہیں بلکہ پوری قوم کی مشترکہ ذمہ داری ہے۔
