یوکرین کے وسطی شہر کریوی ریح میں قائم ایک شاپنگ سینٹر پر روس کے ڈرون حملے میں کم از کم 16 افراد ہلاک اور 130 سے زائد زخمی ہوگئے ہیں۔ یوکرینی حکام کی جانب سے ملبے تلے مزید افراد کی موجودگی کا خدشہ ظاہر کیا گیا ہے۔
برطانوی خبر رساں ادارے رائٹرز کے مطابق علاقائی گورنر اولیکساندر ہانژا کے مطابق جمعے کے روز ہونے والے حملے میں شاپنگ سینٹر کو نشانہ بنایا گیا، جس کے نتیجے میں 22 بچے بھی زخمی ہوئے۔ انہوں نے بتایا کہ 29 زخمیوں کی حالت تشویش ناک ہے، جن میں 5 بچے بھی شامل ہیں۔
گورنر نے کہا کہ ابتدائی اطلاعات کے مطابق 9 افراد تاحال لاپتا ہیں، جن میں 2 بچے شامل ہیں۔ امدادی کارکن ملبہ ہٹانے اور ممکنہ طور پر پھنسے افراد کو تلاش کرنے میں مصروف ہیں۔
یوکرینی صدر ولودیمیر زیلنسکی نے حملے کو انتہائی مذموم اور قابل مذمت قرار دیا۔ ان کا کہنا تھا کہ پہلے ڈرون حملے کے تقریباً آدھے گھنٹے بعد ایک دوسرا روسی ڈرون بھی شاپنگ سینٹر سے ٹکرایا، جس کا مقصد بظاہر امدادی کارکنوں کو بھی نشانہ بنانا تھا۔
زیلنسکی نے ٹیلی گرام پر اپنے بیان میں کہا کہ اس طرح کے حملے دہشت گرد کارروائیوں سے کم نہیں ہیں۔ انہوں نے عالمی برادری پر زور دیا کہ روس کو اس حملے کا ذمہ دار ٹھہرایا جائے۔ یوکرینی صدر نے مزید کہا، ’’ہم یقینی طور پر جواب دیں گے۔
کریوی ریح صدر زیلنسکی کا آبائی شہر بھی ہے۔ حملے کے بعد علاقے میں بڑے پیمانے پر امدادی کارروائیاں شروع کردی گئیں جبکہ صنعتی عمارت سے اٹھنے والے سیاہ دھویں کی تصاویر بھی سامنے آئیں۔
دوسری جانب جمعے ہی کو یوکرین کے جنوبی علاقے میکولائیف میں بھی روسی ڈرون حملہ کیا گیا، جس میں کم از کم 4 افراد ہلاک ہوئے۔ یوکرینی سرکاری میڈیا کے مطابق ہلاک ہونے والوں میں 3 بچے شامل ہیں جبکہ ایک خاتون زخمی ہوئی۔
یوکرین میں روسی فضائی حملوں میں اس وقت تیزی دیکھی جا رہی ہے جب دونوں ممالک کے درمیان کشیدگی میدانِ جنگ میں بھی جاری ہے۔ اس سے ایک روز قبل روس کے بیلسٹک میزائل حملے میں یوکرین کے دارالحکومت کیف میں 17 افراد ہلاک ہوئے تھے۔
دوسری طرف یوکرین نے بھی روس کے خلاف اپنے حملوں میں اضافہ کیا ہے۔ یوکرینی فورسز روس کی تیل تنصیبات اور جنگی سامان کی ترسیل سے متعلق بنیادی ڈھانچے کو نشانہ بنا رہی ہیں تاکہ روس کی جنگی صلاحیت کو متاثر کیا جا سکے۔
