کراچی: اقوام متحدہ کے صنعتی ترقیاتی ادارے (یونیڈو) اور سندھ انٹرپرائز ڈویلپمنٹ فنڈ (ایس ای ڈی ایف) نے دیہی سندھ کے پانچ اضلاع میں کام کرنے والے کاروباری اداروں کے لیے فی منصوبہ ساڑھے تین کروڑ روپے تک کی مشترکہ مالی معاونت کی گرانٹ اسکیم کا آغاز کر دیا ہے۔
یہ اسکیم یورپی یونین کے تعاون سے جاری غربت کے خاتمے اور دیہی سندھ میں جامع ترقی (PAIDAR) پروگرام کے تحت شروع کی گئی ہے۔ درخواستیں جمع کرانے کی آخری تاریخ 15 ستمبر ہے۔
بدھ کو جاری ہونے والے ایک اعلامیے کے مطابق، درخواستوں کے لیے پورٹل — https://portal.sedf.gos.pk/Grants/Home — 21 جولائی سے کھلا ہے، جبکہ اس کا باضابطہ افتتاح بدھ کو کراچی کے ایک مقامی ہوٹل میں منعقدہ تقریب میں کیا گیا۔
اس اسکیم کے تحت یونیڈو-پائیڈار اور ایس ای ڈی ایف اہل منصوبوں کی لاگت کا 70 فیصد تک مشترکہ طور پر فراہم کریں گے، جبکہ درخواست گزار کو کم از کم 30 فیصد حصہ خود ڈالنا ہوگا۔
یہ گرانٹس ٹھٹھہ، سجاول، بدین، تھرپارکر اور لاڑکانہ کے لیے ہیں۔ ماہی گیری اور آبی زراعت، انفارمیشن ٹیکنالوجی، تحقیق و ترقی، اور کچرے کی ری سائیکلنگ اور حیاتیاتی فضلے سے استفادہ کے منصوبوں کو ترجیح دی جائے گی، جبکہ خواتین کی زیر قیادت کاروبار کو خصوصی ترجیح حاصل ہوگی۔
موجودہ چھوٹے اور درمیانے کاروباری ادارے (ایس ایم ایز)، اسٹارٹ اپس، کوآپریٹوز اور کاروباری انجمنیں درخواست دینے کی اہل ہیں، اسی طرح پاکستان کے دیگر حصوں سے تعلق رکھنے والے سرمایہ کار بھی جو ان پانچ اضلاع میں کاروبار شروع کرنے کے خواہشمند ہوں، درخواست دے سکتے ہیں۔
حکام کے مطابق، اسکیم کے باضابطہ آغاز سے قبل ہدف اضلاع میں آگاہی کے لیے روڈ شوز کا انعقاد کیا گیا، جن میں 700 سے زائد افراد نے شرکت کی، جو سندھ بھر کے کاروباری افراد اور صنعتکاروں کی جانب سے اس اسکیم میں گہری دلچسپی کو ظاہر کرتا ہے۔
آف رہے کہ یہ گرانٹ ونڈو یونیڈو اور ایس ای ڈی ایف کے درمیان رواں سال کے اوائل میں پائیڈار پروگرام کے تحت طے پانے والے 3.04 ملین یورو کے مشترکہ مالی معاہدے کو عملی جامہ پہناتی ہے۔ ہر شراکت دار 1.17 ملین یورو فراہم کر رہا ہے، جبکہ مزید 0.7 ملین یورو نجی شعبے کی ایکویٹی سے آنے کی توقع ہے۔ معاہدے کے تحت انٹرپرائز گرانٹ ماڈل کو حکومت سندھ کے ادارے ایس ای ڈی ایف میں ضم کیا جائے گا۔
تقریب کے مہمان خصوصی صوبائی سیکریٹری سندھ منصوبہ بندی، الطاف ایچ ساریو نے کہا کہ حکومت سندھ یورپی یونین، یونیڈو اور ایس ای ڈی ایف کے ساتھ شراکت داری کا خیر مقدم کرتی ہے، جو مقامی کاروباری اداروں کو مالی وسائل تک رسائی، کاروبار کو مضبوط بنانے اور روزگار کے مواقع پیدا کرنے میں مدد دے گی۔
تقریب کے مہمان خصوصی وزیر اعلیٰ سندھ کے معاون خصوصی برائے سرمایہ کاری و پبلک پرائیویٹ پارٹنرشپ سید قاسم نوید قمر نے کہا کہ فنڈ کا قیام صوبائی وسائل کو ایسے کاروباری اداروں کے پیچھے لگانے کے لیے کیا گیا تھا جو سندھ کی معیشت کو ترقی دے سکیں۔
انہوں نے کہا کہ “اس ونڈو میں جو چیز مختلف ہے وہ یہ ہے کہ ہمارا سرمایہ ہمارے شراکت داروں کے سرمائے کے ساتھ کھڑا ہے۔ یہ حکومت سندھ کی اپنی دیہی معیشت میں سرمایہ کاری ہے، اور ہمارے پاس مضبوط تجاویز کے لیے فنڈز تیار ہیں،” انہوں نے اہل کاروباری اداروں پر زور دیا کہ وہ آخری تاریخ سے پہلے اپنی درخواست جمع کروائیں۔
ایس ای ڈی ایف کے چیف ایگزیکٹو آفیسر خضر پرویز نے کہا کہ اس اسکیم کا مقصد ایسے کاروباری افراد کے ساتھ رسک شیئر کرنا ہے جن کے پاس قابل عمل آئیڈیاز تو ہیں لیکن رسمی قرضوں تک رسائی نہیں۔ انہوں نے کہا کہ “30 فیصد شراکت کا مطلب ہے کہ عوامی فنڈنگ کا ہر روپیہ حقیقی عزم سے جڑا ہوگا۔ ہمارا پورٹل کھلا ہے اور ہمارا معیار شفاف ہے۔”
گرانٹس کے تیسرے بیچ کی تقسیم
تقریب میں پائیڈار کی پہلے سے جاری ایس ایم ای بزنس ڈویلپمنٹ گرانٹ اسکیم کے تحت منتخب کیے گئے 17 کاروباری اداروں میں گرانٹس کے تیسرے بیچ کی تقسیم بھی کی گئی، جس کی مجموعی مالیت تقریباً 2.03 ملین یورو ہے۔ یہ ادارے پانچوں پائیڈار اضلاع میں پھیلے ہوئے ہیں اور زراعت، فوڈ پروسیسنگ، بیج کی پیداوار، ماہی گیری، بائیو ٹیکنالوجی، انجینئرنگ، معدنیات اور برآمدی تجارت کے شعبوں میں کام کر رہے ہیں۔ ان میں سے کئی ادارے خواتین کی زیر قیادت ہیں۔
یونیڈو پائیڈار پروگرام کے آفیسر انچارج بدر الاسلام نے کہا کہ پائیڈار مالی معاونت کے ساتھ تکنیکی مدد کو بھی یکجا کرتا ہے تاکہ کاروباری اداروں کو ترقی، زیادہ پائیدار بننے اور کمرشل فنانس تک رسائی میں مدد مل سکے۔
انہوں نے کہا کہ “تین گرانٹ سائیکلز کے ذریعے، پائیڈار تقریباً 6.3 ملین یورو کی گرانٹس کے ساتھ 50 کاروباری اداروں کی معاونت کر چکا ہوگا۔”
تقریب میں سیکریٹری سرمایہ کاری راجہ خرم شہزاد عمر، حکومت سندھ کے دیگر حکام، سول سوسائٹی کے نمائندوں اور کاروباری شخصیات نے بھی بڑی تعداد میں شرکت کی۔
