امریکی کمپنی اوپن اے آئی نے منگل کو نوجوانوں کے لیے چیٹ جی پی ٹی کا خصوصی ورژن متعارف کرا دیا، جس کا مقصد 13 سے 17 سال کی عمر کے صارفین کو مصنوعی ذہانت تک رسائی فراہم کرتے ہوئے ان کے لیے مزید مضبوط حفاظتی اقدامات یقینی بنانا ہے۔ کمپنی کے مطابق نئے ورژن میں نوعمر صارفین کی عمر اور ذہنی نشوونما کو مدنظر رکھتے ہوئے حفاظتی نظام ترتیب دیا گیا ہے۔
چیٹ جی پی ٹی فار ٹینز میں فحش اور نامناسب مواد، خود کو نقصان پہنچانے، خودکشی، جنسی اور رومانوی گفتگو سے متعلق مواد پر سخت پابندیاں عائد کی گئی ہیں۔ اس کے علاوہ چیٹ بوٹ کو اس انداز میں تیار کیا گیا ہے کہ وہ طلبہ کو محض ہوم ورک کے جوابات فراہم کرنے کے بجائے مسائل خود حل کرنے اور تصورات سمجھنے میں مدد دے۔ اوپن اے آئی کے مطابق اس کا مقصد رٹنے کے بجائے فعال انداز میں سیکھنے کی حوصلہ افزائی کرنا ہے۔
اوپن اے آئی کی عالمی پالیسی کی نائب صدر این او لیری کے مطابق کمپنی نوجوانوں کو بچوں کی طرح مخاطب کرنے کے بجائے ان کی عمر اور ذہنی نشوونما کے مطابق رہنمائی فراہم کرنا چاہتی ہے، تاہم انہیں ایسے مواد سے بھی محفوظ رکھا جائے گا جس تک ان کی رسائی مناسب نہیں۔ کمپنی صارفین کی عمر کا اندازہ ان کے سوالات اور رویوں کی بنیاد پر لگائے گی اور نابالغ قرار پانے والے صارفین کو خودکار طور پر نوعمر افراد کے لیے تیار کردہ ورژن پر منتقل کیا جائے گا۔
والدین یا سرپرست نوعمر صارف کے اکاؤنٹ سے اپنا اکاؤنٹ منسلک کرکے مخصوص اوقات میں چیٹ جی پی ٹی کے استعمال کو روکنے کے لیے ’کوآئٹ آورز‘ مقرر کرسکیں گے۔ خطرناک صورتحال، مثلاً خود کو نقصان پہنچانے کے اشارے یا کھانے سے متعلق عوارض کے خدشے کی صورت میں والدین کو حفاظتی اطلاع بھی دی جائے گی، تاہم صارفین کی رازداری کو بھی مدنظر رکھا جائے گا۔ اوپن اے آئی کے مطابق والدین کی جانب سے کنٹرول فعال نہ کیے جانے کی صورت میں بھی چیٹ بوٹ نوجوانوں کے لیے حفاظتی پابندیوں کے ساتھ کام کرے گا۔
