پاکستان نے بھارتی پروازوں کے لیے اپنی فضائی حدود کی بندش میں مزید توسیع کردی ہے۔
پاکستان ایئرپورٹس اتھارٹی نے بھارتی طیاروں کے پاکستانی فضائی حدود میں داخلے پر پابندی کے حوالے سے نیا نوٹم جاری کردیا۔ نوٹم کے مطابق بھارت میں رجسٹرڈ تمام ایئرلائنز، لیز پر لیے گئے طیاروں جبکہ بھارتی شہریوں کی ملکیت یا ان کے زیرِ انتظام کمرشل اور فوجی طیاروں کے پاکستانی فضائی حدود میں داخلے پر پابندی برقرار رہے گی۔
میڈیا رپورٹ کے مطابق نئی توسیع کے تحت یہ پابندی پاکستانی وقت کے مطابق 24 ستمبر کی صبح 4 بج کر 59 منٹ تک نافذ رہے گی۔ پابندی کا موجودہ مرحلہ 18 اگست سے نافذ کیا گیا تھا۔
بھارتی پروازوں کے لیے پاکستانی فضائی حدود بند کرنے کا سلسلہ 23 اپریل 2025 سے شروع ہوا تھا، جس کے بعد اس پابندی میں متعدد مرتبہ توسیع کی جاچکی ہے۔ تازہ نوٹم اس سلسلے کا 16واں نوٹم ہے۔
