مصنوعی ذہانت کے پلیٹ فارم چیٹ جی پی ٹی نے مفت صارفین کے لیے تحریری چیٹس کی حد ختم کرنے کا اعلان کردیا ہے۔
رپورٹ کے مطابق اوپن اے آئی نے چیٹ جی پی ٹی کے لیے نیا جی پی ٹی-5.6 لونا ماڈل متعارف کرایا ہے، جو مفت اور گو صارفین کے لیے پہلے سے موجود جی پی ٹی-5.5 کی جگہ بطور ڈیفالٹ ماڈل کام کرے گا۔
نئے اپ ڈیٹ کے بعد مفت صارفین تحریری چیٹس کے لیے لامحدود سہولت حاصل کرسکیں گے، تاہم فائلز، تصاویر، آواز اور تصویر بنانے کی سہولت کے لیے الگ حدود برقرار رہیں گی۔
نئے نظام میں صارفین کو ’سوچیں‘ بٹن بھی فراہم کیا جائے گا، جس کے ذریعے وہ پیچیدہ سوالات کے لیے زیادہ بہتر تجزیاتی صلاحیت استعمال کرسکیں گے۔
اوپن اے آئی کے مطابق پلس اور پرو صارفین کے لیے بھی نئی سہولیات شامل کی گئی ہیں۔ انہیں اپ گریڈ شدہ جی پی ٹی-5.6 سول ماڈل تک رسائی دی جائے گی، جو سوالات، ویب تحقیق، مشوروں، منصوبہ بندی، تحریر اور فیصلہ سازی جیسے کاموں کے لیے زیادہ مؤثر ہوگا۔
پلس اور پرو صارفین کے لیے ’سوچنے کی سطح‘ کو تبدیل کرنے والا اختیار بھی متعارف کرایا گیا ہے، جس کے ذریعے صارفین طے کرسکیں گے کہ کسی جواب کے لیے ماڈل کتنی گہرائی سے سوچے۔
اوپن اے آئی کے مطابق اندرونی جائزے میں جی پی ٹی-5.5 انسٹنٹ کے مقابلے میں جی پی ٹی-5.6 لونا میں حقائق پر مبنی غلطیاں 62 فیصد کم جبکہ جی پی ٹی-5.6 سول میں 68 فیصد کم پائی گئیں۔
کمپنی نے بتایا کہ جی پی ٹی-5.6 سول کا نیا ورژن پلس اور پرو صارفین کے لیے فوری طور پر دستیاب کردیا گیا ہے، جبکہ مفت اور گو صارفین کے لیے دیگر تبدیلیاں رواں ہفتے متعارف کرائی جارہی ہیں۔
اگلے ہفتے صارفین کو لامحدود تحریری چیٹس اور مشکل سوالات کے لیے نئے ’سوچیں‘ بٹن تک رسائی بھی مل جائے گی۔
