سعودی عرب، پاکستان اور ترکیہ کے درمیان آج جدہ میں اہم سربراہی اجلاس متوقع ہے، جہاں میڈیا رپورٹس کے مطابق تینوں ممالک مشترکہ دفاعی معاہدے پر دستخط کریں گے۔ وزیراعظم شہباز شریف اور فیلڈ مارشل سید عاصم منیر سعودی ولی عہد کی دعوت پر جدہ پہنچ چکے ہیں، جبکہ ترک صدر رجب طیب اردوان بھی آج سعودی عرب پہنچیں گے۔
سعودی عرب کے شہر جدہ میں آج سعودی عرب، پاکستان اور ترکیہ کے سربراہان کے درمیان اہم اجلاس متوقع ہے، جس میں علاقائی صورتحال، دفاعی تعاون اور باہمی شراکت داری پر تبادلہ خیال کیا جائے گا۔
فرانسیسی خبر رساں ادارے کے مطابق سعودی فوج کے ذرائع نے دعویٰ کیا ہے کہ اجلاس کے دوران تینوں ممالک کے درمیان مشترکہ دفاعی معاہدے پر دستخط کیے جائیں گے۔
نام ظاہر نہ کرنے کی شرط پر ذرائع کا کہنا ہے کہ اس دفاعی معاہدے پر کافی عرصے سے غور کیا جا رہا تھا، تاہم خطے میں حالیہ پیش رفت کے باعث اس عمل میں تیزی آئی ہے۔
ذرائع کے مطابق سعودی ولی عہد شہزادہ محمد بن سلمان، وزیراعظم شہباز شریف اور ترکیہ کے صدر رجب طیب اردوان آج جدہ میں ملاقات کریں گے۔
سعودی ولی عہد کی دعوت پر وزیراعظم شہباز شریف اور فیلڈ مارشل سید عاصم منیر گزشتہ روز جدہ پہنچے، جہاں مکہ کے نائب گورنر نے ان کا استقبال کیا۔
وزیراعظم شہباز شریف کی سعودی ولی عہد محمد بن سلمان سے علیحدہ ملاقات بھی متوقع ہے، جس میں دوطرفہ تعلقات، اقتصادی تعاون، علاقائی امن اور مشترکہ مفادات کے امور پر تبادلہ خیال کیا جائے گا۔
ترجمان دفتر خارجہ کے مطابق وزیراعظم کا دورہ خطے میں امن، سفارتی تعاون اور مشترکہ حکمت عملی کے فروغ کے حوالے سے اہمیت کا حامل ہے۔
ترجمان نے کہا کہ پاکستان مشرق وسطیٰ میں کشیدگی کے خاتمے اور تنازعات کے پُرامن حل کے لیے اپنی سفارتی کوششیں جاری رکھے ہوئے ہے۔
دفتر خارجہ کے مطابق پاکستان کو امید ہے کہ آبنائے ہرمز سے متعلق اتفاقِ رائے اور مفاہمتی فریم ورک پر پیش رفت سے ایران اور امریکا کے درمیان مذاکرات کی راہ بھی ہموار ہوگی۔
