ایران اور امریکا کے درمیان کشیدگی ایک بار پھر شدت اختیار کر گئی ہے۔ ایرانی حکام نے خبردار کیا ہے کہ اگر امریکا یا اسرائیل نے ایران کی اہم تنصیبات پر حملہ کیا تو اس کا بھرپور جواب دیتے ہوئے اسرائیل کی اہم تنصیبات اور خطے میں موجود امریکی توانائی کے انفراسٹرکچر کو نشانہ بنایا جائے گا۔ دوسری جانب امریکی صدر ڈونلڈ ٹرمپ نے عندیہ دیا ہے کہ ایران کے ساتھ جاری تصادم ابھی ختم نہیں ہوا اور ضرورت پڑنے پر امریکی کارروائیاں جاری رہیں گی۔
ایران کی سرکاری خبر رساں ایجنسی سے وابستہ ذرائع کے مطابق ایک سینیئر سیکیورٹی عہدیدار نے کہا ہے کہ امریکی میڈیا میں ایران پر ممکنہ حملوں کی خبریں ’دیوانگی‘ کے مترادف ہیں اور تہران نے ہر ممکن صورتحال سے نمٹنے کے لیے جامع جوابی منصوبے تیار کر رکھے ہیں۔ ان کے مطابق ایرانی مسلح افواج اسرائیل کی اہم تنصیبات اور خطے میں امریکی توانائی کے مراکز کو نشانہ بنانے کی صلاحیت اور عزم رکھتی ہیں۔
اسی دوران ایران کے سپریم لیڈر کے سینیئر فوجی مشیر محسن رضائی نے کہا کہ آبنائے ہرمز کا معاملہ صرف خطے کے ممالک سے متعلق ہے اور امریکا کا وہاں کوئی کردار نہیں بنتا۔ انہوں نے سوال اٹھایا کہ واشنگٹن کس جواز کے تحت اس اہم آبی گزرگاہ میں مداخلت کر رہا ہے، جبکہ ایران اب بھی امریکا کے ساتھ تعلقات کو تصادم کی کیفیت میں سمجھتا ہے۔
دوسری جانب امریکی سینٹرل کمانڈ (سینٹکام) کا کہنا ہے کہ وہ ایران کے خلاف اپنی بحری کارروائیاں جاری رکھے ہوئے ہے۔ امریکی حکام کے مطابق متعدد تجارتی جہازوں کا رخ موڑا گیا، بعض بحری جہازوں کی تلاشی لی گئی، جبکہ انسانی امداد لے جانے والے جہازوں کو گزرنے کی اجازت دی جا رہی ہے۔
امریکی وزیر خارجہ مارکو روبیو نے کہا ہے کہ ایرانی قیادت کو اب ایسے امریکی صدر کا سامنا ہے جو صرف مذاکرات پر اکتفا نہیں کرتا بلکہ عملی اقدامات پر یقین رکھتا ہے۔ ان کے بقول ماضی میں ایران نے معاہدوں کی خلاف ورزی اور عالمی برادری کو گمراہ کرنے کی کوشش کی، لیکن موجودہ امریکی انتظامیہ اس طرز عمل کو مزید برداشت نہیں کرے گی۔
ادھر پینٹاگون کے ترجمان شان پارنل نے ’آپریشن ایپک فیوری‘ کو امریکی فوجی طاقت کا واضح مظہر قرار دیتے ہوئے کہا کہ اس کارروائی نے دنیا کو امریکی افواج کی مشترکہ جنگی صلاحیت اور مہلک قوت دکھا دی ہے۔
صدر ڈونلڈ ٹرمپ نے بھی ایران کے ساتھ جاری کشیدگی پر گفتگو کرتے ہوئے کہا کہ لڑائی مزید جاری رہ سکتی ہے اور امریکی عوام کو اس امکان کے لیے تیار رہنا چاہیے۔ انہوں نے کہا کہ ایران وقتی طور پر جوابی حملے کر سکتا ہے، تاہم وقت گزرنے کے ساتھ اس کی صلاحیت کمزور ہوتی جائے گی۔ ٹرمپ نے دعویٰ کیا کہ ایران کی بحریہ، فضائیہ اور فضائی دفاعی نظام کو شدید نقصان پہنچایا جا چکا ہے، اگرچہ اس کے پاس محدود جوابی صلاحیت اب بھی موجود ہے۔
امریکی صدر نے یہ بھی اعتراف کیا کہ ایران کے ساتھ مذاکرات کے امکانات کمزور پڑتے جا رہے ہیں۔ ان کا کہنا تھا کہ انہیں تہران کی نیت پر اعتماد نہیں رہا کیونکہ ایرانی قیادت مذاکرات میں سچ نہیں بولتی اور حقائق کو مسخ کرتی ہے۔ ان کے بقول امریکا کا مقصد صرف ایک ہے، اور وہ ہے اس تنازع میں کامیابی حاصل کرنا۔
دوسری جانب ایرانی حکام کے سخت بیانات اور امریکی قیادت کی تازہ وارننگز نے خطے میں ایک نئے تصادم کے خدشات کو مزید بڑھا دیا ہے، جبکہ عالمی توانائی کی ترسیل، آبنائے ہرمز کی سلامتی اور مشرقِ وسطیٰ کی مجموعی صورتحال پر بھی دنیا بھر کی نظریں مرکوز ہیں۔
