وفاقی وزیر خزانہ و محصولات سینیٹر محمد اورنگزیب نے اپنے دورۂ امریکا کے دوران امریکی وزیر خزانہ اسکاٹ بیسنٹ سے ملاقات کی، جس میں پاکستان اور امریکا کے درمیان اقتصادی تعاون، سرمایہ کاری اور اصلاحاتی ایجنڈے پر تفصیلی تبادلہ خیال کیا گیا۔
ملاقات میں وزیر خزانہ نے پاکستان کی معیشت کے میکرو اکنامک استحکام سے پائیدار اور برآمدات پر مبنی ترقی کی جانب سفر پر روشنی ڈالتے ہوئے کہا کہ خطے کی جغرافیائی و سیاسی صورتحال کے باعث ملکی معیشت کو مختلف چیلنجز کا سامنا رہتا ہے۔
سینیٹر محمد اورنگزیب نے پاکستان کو عالمی سرمایہ جاتی منڈیوں تک بہتر رسائی، زرمبادلہ کے ذخائر میں اضافے اور خودمختار کریڈٹ ریٹنگ میں بہتری کے لیے امریکا کے تعاون کی ضرورت پر زور دیا۔ دونوں رہنماؤں نے دوطرفہ اقتصادی تعاون کو مزید فروغ دینے، امریکی سرمایہ کاری میں اضافے اور مشترکہ اسٹریٹجک منصوبوں کو آگے بڑھانے کے عزم کا اعادہ کیا۔
دریں اثنا، وزیر خزانہ نے یو ایس انٹرنیشنل ڈویلپمنٹ فنانس کارپوریشن (ڈی ایف سی) کے نمائندوں سے بھی ملاقات کی، جس میں توانائی، انفارمیشن ٹیکنالوجی، انفراسٹرکچر، معدنیات، خوراک اور زراعت سمیت ترجیحی شعبوں میں تعاون پر گفتگو کی گئی۔
اس موقع پر وزیر خزانہ نے کہا کہ حکومت پاکستان ان شعبوں میں ڈی ایف سی کے مؤثر تعاون کی خواہاں ہے۔ انہوں نے بندرگاہوں، ٹیلی کمیونیکیشن، آئی ٹی، توانائی، معدنیات، دواسازی، مینوفیکچرنگ اور سپلائی چین کی بہتری پر ڈی ایف سی کی خصوصی توجہ کا خیرمقدم کرتے ہوئے کہا کہ یہ ترجیحات حکومت پاکستان کے ترقیاتی وژن سے مکمل ہم آہنگ ہیں۔
سینیٹر محمد اورنگزیب نے ڈی ایف سی کے وفد کو پاکستان کا دورہ کرنے، سرمایہ کاری کے قابل عمل منصوبوں کی نشاندہی کرنے اور متعلقہ شراکت داروں کے ساتھ مشترکہ کاروباری منصوبے تشکیل دینے کی دعوت بھی دی۔
