موسیقی کی معروف ایپ اسپوٹیفائی نے پریمیم صارفین کے لیے مصنوعی ذہانت پر مبنی نیا چیٹ فیچر متعارف کرا دیا ہے، جس کے ذریعے صارفین ایپ سے بات چیت کرکے موسیقی، آڈیو بکس اور پوڈکاسٹس تلاش کر سکیں گے۔
کمپنی کے مطابق یہ نیا فیچر روایتی وائس کمانڈز سے مختلف ہے، کیونکہ صارفین اسپوٹیفائی کے ساتھ دو طرفہ گفتگو کر سکیں گے۔ صارفین اپنی درخواستیں لکھ کر یا بول کر دے سکیں گے، جس پر ایپ گانے تجویز کرے گی، نئے فنکاروں سے متعارف کرائے گی، پلے لسٹس کو بہتر بنائے گی اور کسی گانے یا البم کے پس منظر کے بارے میں معلومات فراہم کرے گی۔
اسپوٹیفائی کے مطابق یہ فیچر کمپنی کی اپنی مصنوعی ذہانت کی ٹیکنالوجی اور مختلف شراکت دار اداروں کے مصنوعی ذہانت ماڈلز کے امتزاج سے تیار کیا گیا ہے۔
نئے فیچر کے ذریعے صارفین اپنی پسند کے مطابق موسیقی دریافت کر سکیں گے۔ وہ زیادہ تیز رفتار یا نئی موسیقی، پہلے کبھی نہ سنے گئے فنکاروں کے گانے اور مخصوص فنکاروں کو اپنی سفارشات میں شامل کرنے کی درخواست بھی کر سکیں گے۔
مصنوعی ذہانت پر مبنی چیٹ فیچر صارفین کی جانب سے گانے محفوظ کرنے، پلے بیک فہرست میں شامل کرنے اور فنکاروں کو فالو کرنے میں بھی مدد دے گا۔
اسپوٹیفائی کا کہنا ہے کہ یہ فیچر صرف موسیقی کی سفارشات تک محدود نہیں بلکہ صارفین اپنی سننے کی عادات سے متعلق سوالات بھی کر سکیں گے۔ مثال کے طور پر وہ معلوم کر سکیں گے کہ انہوں نے کوئی گانا پہلی بار کب سنا، حالیہ موسیقی کے رجحانات کا جائزہ لے سکیں گے یا اپنی پسندیدہ موسیقی کی اقسام کے بارے میں معلومات حاصل کر سکیں گے۔
اس کے علاوہ یہ فیچر البمز کے اجرا کی تاریخ، فنکاروں کے پس منظر اور پوڈکاسٹس یا آڈیو بکس سے متعلق معلومات بھی فراہم کر سکے گا۔
فی الحال یہ سہولت 18 سال یا اس سے زائد عمر کے پریمیم صارفین کے لیے آزمائشی مرحلے میں امریکا، آئرلینڈ اور سویڈن میں دستیاب کی گئی ہے، جبکہ آزمائش مکمل ہونے کے بعد اسے مزید ممالک تک توسیع دینے کا منصوبہ ہے
