انجینئرز نے شہد کی مکھیوں کے چھتے (ہنی کومب) کی منفرد ساخت سے متاثر ہو کر سولر پینلز کا ایک جدید ڈیزائن تیار کیا ہے جس کے بارے میں دعویٰ کیا جا رہا ہے کہ یہ شمسی توانائی کے شعبے کی ایک بڑی تکنیکی خامی کو دور کرنے میں مددگار ثابت ہو سکتا ہے۔
غیر ملکی میڈیا رپورٹس کے مطابق روایتی سولر پینلز اس وقت بہترین کارکردگی دکھاتے ہیں جب سورج کی روشنی براہِ راست ان پر پڑتی ہے تاہم جیسے ہی سورج کا زاویہ تبدیل ہوتا ہے روشنی کا ایک بڑا حصہ پینل سے منعکس ہو کر ضائع ہو جاتا ہے جس سے بجلی کی پیداوار کم ہو جاتی ہے۔
اس مسئلے کے حل کے لیے انجینئرز نے شہد کی مکھیوں کے چھتے سے متاثر ہو کر ایک تھری ڈی مقعر (3D Concave) ڈیزائن تیار کیا ہے جس میں پینل کی اندرونی ساخت اس انداز سے بنائی گئی ہے کہ منعکس ہونے والی روشنی دوبارہ اندر ہی واپس آ کر جذب ہو جاتی ہے۔ اس طریقہ کار کو “اینہانسڈ لائٹ ریکیپچر” (Enhanced Light Recapture) کا نام دیا گیا ہے جس سے سورج کی روشنی سے زیادہ سے زیادہ توانائی حاصل کی جا سکتی ہے۔
محققین کے مطابق نئے ڈیزائن نے تجربات کے دوران روایتی فلیٹ سولر پینلز کے مقابلے میں زیادہ سے زیادہ بجلی پیدا کرنے کی صلاحیت میں 142.3 فیصد تک اضافہ ریکارڈ کیا۔ براہِ راست سورج کی روشنی میں بجلی کی پیداوار 36.4 فیصد جبکہ 60 ڈگری زاویے پر جہاں عام سولر پینلز کی کارکردگی نمایاں طور پر متاثر ہوتی ہے، 61.8 فیصد بہتری دیکھی گئی۔
ماہرین کا کہنا ہے کہ شہد کے چھتے کی جیومیٹری کم سے کم مواد میں زیادہ مضبوطی فراہم کرتی ہے، اسی تصور کو استعمال کرتے ہوئے پینل کی سطح میں باریک وادیاں نما ساختیں بنائی گئی ہیں جو روشنی کو باہر نکلنے کے بجائے اندر ہی گردش کرنے پر مجبور کرتی ہیں۔
چونکہ اس نئی ٹیکنالوجی میں استعمال ہونے والا میٹا میٹریل لچکدار ہے اس لیے اسے صرف گھروں کی چھتوں تک محدود رکھنے کے بجائے منحنی عمارتوں، الیکٹرک گاڑیوں اور ایرو اسپیس آلات میں بھی استعمال کیا جا سکتا ہے۔ ماہرین کے مطابق اگر یہ ٹیکنالوجی تجارتی سطح پر کامیاب ثابت ہوئی تو مہنگے سن ٹریکنگ سسٹمز کے بغیر بھی سولر پینلز کی کارکردگی میں نمایاں اضافہ ممکن ہوگا۔
