وزارتِ خزانہ نے پاکستان کے خودمختار فنانسنگ معاملات، جن میں یورو بانڈ اور پانڈا بانڈ کا اجرا شامل ہے، سے متعلق حالیہ میڈیا رپورٹس اور عوامی تبصروں پر حقائق واضح کرتے ہوئے گمراہ کن دعوؤں کو دوٹوک انداز میں مسترد کردیا۔
وزارتِ خزانہ کے مطابق یہ دعوے نامکمل معلومات پر مبنی ہیں اور ان میں اہم حقائق اور پس منظر کو نظر انداز کیا گیا ہے۔
تمام قانونی اور ضابطہ جاتی تقاضے پورے کیے گئے
وزارتِ خزانہ نے واضح کیاکہ یورو بانڈ اور پاکستان کے پہلے پانڈا بانڈ کا اجرا تمام قابلِ اطلاق قانونی، ضابطہ جاتی، خریداری اور منظوری کے تقاضوں کے مطابق کیا گیا۔
بیان میں کہا گیا کہ صرف نمایاں کوپن ریٹ یا مدت کی بنیاد پر مختلف فنانسنگ معاملات کا موازنہ کرنا گمراہ کن ہے۔ خودمختار فنانسنگ کے فیصلے انتہائی پیچیدہ ہوتے ہیں اور ان میں قیمت، مدت، کامیاب اجرا کی یقین دہانی، انڈر رائٹنگ کی ذمہ داری، وقت، لین دین کی مجموعی لاگت، بینچ مارک کے مقابلے میں کریڈٹ اسپریڈ، موجودہ مارکیٹ حالات اور پاکستان کی وسط مدتی قرض انتظامی حکمتِ عملی کا جامع جائزہ لیا جاتا ہے۔
بیان کے مطابق حکومت فنانسنگ کا ایسا آپشن منتخب کرتی ہے جو وسط مدتی قرض انتظامی حکمتِ عملی کے مطابق قیمت، مدت، کامیاب اجرا کی یقین دہانی، وقت اور خطرات کے درمیان بہترین توازن فراہم کرے۔
ادارہ جاتی تقرریوں کا فنانسنگ معاملات کی قانونی حیثیت سے کوئی تعلق نہیں
وزارتِ خزانہ کے مطابق ادارہ جاتی تقرریوں سے متعلق انتظامی معاملات کا خودمختار فنانسنگ لین دین کی قانونی حیثیت یا انتظامی نگرانی پر کوئی اثر نہیں پڑتا۔
بیان میں کہا گیا ہے کہ قرض انتظامی دفتر اور فنانس ڈویژن کے پاس خودمختار فنانسنگ معاملات کو تمام قابلِ اطلاق قوانین، ضوابط اور طریقہ کار کے مطابق مؤثر انداز میں سنبھالنے کے لیے مطلوبہ صلاحیت اور مہارت موجود ہے۔
بیان میں کہا گیا کہ غلط اور گمراہ کن معلومات کا پھیلاؤ سرمایہ کاروں کے اعتماد کو نقصان پہنچا سکتا ہے، بین الاقوامی کیپٹل مارکیٹس میں پاکستان کی ساکھ متاثر کرسکتا ہے، مستقبل میں قرض لینے کی لاگت بڑھا سکتا ہے اور ملک کے تزویراتی فنانسنگ مقاصد کو نقصان پہنچا سکتا ہے۔
وزارتِ خزانہ نے کہاکہ عوامی بحث تصدیق شدہ حقائق، مکمل معلومات اور ذمہ دارانہ رپورٹنگ پر مبنی ہونی چاہیے۔
وزارتِ خزانہ نے شفافیت، پیشہ ورانہ طرزِ عمل اور محتاط قرض انتظام کے اعلیٰ ترین معیار پر کاربند رہنے کے عزم کا اعادہ کرتے ہوئے کہاکہ خودمختار فنانسنگ کے فیصلے صرف پاکستان کے بہترین معاشی اور تزویراتی مفادات کو مدنظر رکھتے ہوئے کیے جاتے رہیں گے۔
