ملک کے مختلف حصوں میں ہونے والی موسلا دھار بارشوں نے جہاں گرمی کی شدت کم کر دی، وہیں کئی علاقوں میں سیلابی صورتحال پیدا ہو گئی ہے۔ پنجاب میں متعدد شہر زیر آب آ گئے، جبکہ گلگت بلتستان میں بادل پھٹنے، گلیشیئر پگھلنے اور سیلابی ریلوں نے بڑے پیمانے پر تباہی مچا دی۔ صورتحال کے پیش نظر خیبرپختونخوا میں پی ڈی ایم اے نے ہائی الرٹ جاری کرتے ہوئے شہریوں اور سیاحوں کو غیر ضروری سفر سے گریز کی ہدایت کی ہے۔
ملک کے مختلف علاقوں میں حالیہ مون سون بارشوں کے باعث معمولات زندگی شدید متاثر ہوئے ہیں۔ پنجاب کے مختلف شہروں شکر گڑھ، فاروق آباد، حافظ آباد، ننکانہ صاحب، بھلوال، شرقپور شریف، فیروزوالا، اٹک، حسن ابدال، جہلم اور خانیوال میں موسلا دھار بارش کے باعث نشیبی علاقے زیر آب آ گئے، جبکہ گلیاں، بازار اور سڑکیں تالاب کا منظر پیش کرنے لگیں۔
خانیوال میں بارش کے دوران متعدد بجلی کے فیڈر ٹرپ کر گئے، جس سے کئی علاقوں میں بجلی کی فراہمی معطل ہو گئی۔ حسن ابدال میں طوفانی بارش کے باعث مختلف مقامات پر دیواریں گرنے کے واقعات بھی پیش آئے۔
دوسری جانب گلگت بلتستان کے ضلع دیامر اور گردونواح میں شدید بارش، بادل پھٹنے اور گلیشیئرز پگھلنے سے آنے والے سیلابی ریلوں نے بڑے پیمانے پر تباہی مچا دی۔ سیلاب کے باعث متعدد رابطہ پل اور سڑکیں بہہ گئیں، جبکہ مختلف مقامات پر لینڈ سلائیڈنگ کے باعث ہزاروں مقامی افراد اور سیاح پھنس گئے۔
چلاس شہر اور اس کے نواحی علاقوں میں پینے کے پانی کی مرکزی پائپ لائنیں، بجلی کے کھمبے اور دیگر بنیادی ڈھانچہ بھی سیلابی ریلوں کی نذر ہو گیا، جس کے باعث پانی اور بجلی کی فراہمی معطل ہو گئی ہے۔
ادھر خیبرپختونخوا کے پراونشل ڈیزاسٹر مینجمنٹ اتھارٹی (پی ڈی ایم اے) نے آئندہ 24 گھنٹوں کے لیے مختلف اضلاع میں سیلاب اور لینڈ سلائیڈنگ کا الرٹ جاری کر دیا ہے۔
پی ڈی ایم اے کے مطابق چترال، سوات، دیر، شانگلہ، مانسہرہ اور کوہستان میں لینڈ سلائیڈنگ، جبکہ ملاکنڈ اور ہزارہ ڈویژن میں اچانک سیلاب آنے کا خدشہ ہے۔
صوابی میں گزشتہ رات آنے والی آندھی اور تیز بارش سے کھڑی فصلوں کو بھی نقصان پہنچا ہے۔
پی ڈی ایم اے نے شہریوں اور سیاحوں کو ہدایت کی ہے کہ وہ غیر ضروری سفر سے گریز کریں، دریاؤں، ندی نالوں اور برساتی گزرگاہوں سے دور رہیں اور کسی بھی ہنگامی صورتحال میں متعلقہ اداروں کی ہدایات پر عمل کریں۔
