نائب وزیراعظم اور وزیر خارجہ سینیٹر محمد اسحاق ڈار نے کہا ہے کہ پاکستان کثیرالجہتی نظام (ملٹی لیٹرل ازم) کے لیے اپنے غیر متزلزل عزم پر قائم ہے اور عالمی نظام میں اقوام متحدہ کے مرکزی کردار کی بھرپور حمایت جاری رکھے گا۔
ترجمان دفتر خارجہ کے مطابق اقوام متحدہ کے سیکریٹری جنرل کے عہدے کے امیدوار اور سینیگال کے سابق صدر میکی سال نے گنی بساؤ کے سابق صدر جنرل عمرُو سساکو ایمبالو کے ہمراہ اسلام آباد میں نائب وزیراعظم و وزیر خارجہ سینیٹر محمد اسحاق ڈار سے ملاقات کی۔
ملاقات کے دوران نائب وزیراعظم نے اس بات پر زور دیا کہ اقوام متحدہ کے منشور کے مقاصد اور اصولوں، بین الاقوامی قانون اور معاہدوں کا احترام یقینی بنایا جانا چاہیے جبکہ اقوام متحدہ کی سلامتی کونسل کی قراردادوں خصوصاً فلسطین اور جموں و کشمیر سے متعلق قراردادوں پر مکمل اور مخلصانہ عمل درآمد عالمی امن و سلامتی کے لیے ناگزیر ہے۔
اسحاق ڈار نے امید ظاہر کی کہ نئے سیکریٹری جنرل کی قیادت میں اقوام متحدہ ابھرتے ہوئے عالمی چیلنجز سے نمٹنے کے لیے خود کو مزید مؤثر انداز میں ہم آہنگ کرے گی اور عالمی ترقی کے ایجنڈے کو آگے بڑھانے میں فعال کردار ادا کرے گی۔
انہوں نے اس موقع پر ایک بار پھر اس عزم کا اعادہ کیا کہ پاکستان اقوام متحدہ کے مؤثر، فعال اور مضبوط کردار کی حمایت جاری رکھے گا تاکہ عالمی امن، استحکام اور بین الاقوامی تعاون کو فروغ دیا جا سکے۔
