امریکی صدر ڈونلڈ ٹرمپ نے کہا ہے کہ ایران امریکہ کے ساتھ معاملہ طے کرنا چاہتا ہے، ایران کو جنازے کے لیے ایک ہفتے کی مہلت دی ہے۔
امریکہ کی 250ویں یومِ تاسیس کی تقریبات کا آغاز کرتے ہوئے امریکی صدر ڈونلڈ ٹرمپ نے کہا ہے کہ ہم نے ایک ہی دن میں وینزویلا کو شکست دی، اور ایران کو بھی بری طرح نشانہ بنایا، وہ سمجھوتہ کرنے کے لیے بے تاب ہیں، وہ بڑی شدت سے سمجھوتہ کرنا چاہتے ہیں۔
امریکی صدر ڈونلڈ ٹرمپ نے مزید دعویٰ کیا کہ ہم نے انہیں جنازے کے لیے ایک ہفتے کی مہلت دی، کیونکہ ہم اچھے لوگ ہیں، امریکہ کبھی کسی بادشاہ کے سامنے نہیں جھکا، امریکہ دنیا کا طاقت ور ترین ملک ہے۔
ٹرمپ نے کہا کہ امریکہ امریکی کلچر کے بغیر آزادی کا دعوی نہیں کر سکتا، امریکہ سے زیادہ دنیا سے بھوک کا خاتمہ کسی نے نہیں کیا، امریکہ نے اپنے ہمسایوں کی مشکل میں ہمیشہ مدد کی، امریکی بہت مضبوط قوم ہیں۔
امریکی صدر نے کہا کہ امریکہ امن پسند ہے لیکن کسی خطرے کو بھی برداشت نہیں کرے گا، ہم نے دنیا کی طاقتور ترین فوج بنائی ہے، امریکہ نے دو عالمی جنگیں جیتیں، بائیڈن انتظامیہ نے امریکہ کو تباہ کر دیا، دو سال پہلے تک دنیا ہم پر ہنستی تھی،اب عزت کرتی ہے۔
