ابوظہبی کے قصر الإمارات میں عرب دنیا کے پہلے عالمی بچوں کے فیشن ویک کا افتتاح الشيخة فاخرة بنت ذياب بن سيف آل نهيان نے کیا، جسے معروف اماراتی فیشن ڈیزائنر ڈاکٹر منى المنصوري نے منظم کیا۔ الخلیج کے مطابق ایونٹ میں فنکاروں، میڈیا شخصیات، سفیروں اور سفارتی نمائندوں سمیت متعدد مہمانوں نے شرکت کی۔
رپورٹ کے مطابق اس فیشن شو میں 85 بچوں نے حصہ لیا، جن کا تعلق روس، اٹلی، متحدہ عرب امارات، اسپین، تھائی لینڈ، قازقستان اور فلپائن سمیت مختلف ممالک سے تھا۔ شو میں امارات، مراکش، عمان، قازقستان اور روس کے ڈیزائنرز کی تیار کردہ کوٹور، فینٹسی اور روایتی ملبوسات پیش کیے گئے، جن کے ذریعے بچوں کی تخلیقی صلاحیت اور ثقافتی تنوع کو نمایاں کیا گیا۔
افتتاحی تقریب میں الشيخة فاخرة بنت ذياب نے مہمانوں کو ابوظہبی میں خوش آمدید کہا اور ایونٹ کے منتظمین، ڈیزائنرز، بچوں اور شرکا کا شکریہ ادا کیا۔ ڈاکٹر منى المنصوري نے اپنے خطاب میں کہا کہ بچوں کے فیشن ویک کا مقصد صرف فیشن پیش کرنا نہیں بلکہ تین اہم انسانی پیغامات کو اجاگر کرنا ہے، جن میں کینسر سے لڑنے والے بچوں کی حمایت، دائمی اور مشکل بیماریوں سے متاثرہ بچوں کے ساتھ یکجہتی، مختلف ثقافتوں کا تعارف اور بچوں کے لیے کھیلوں کی اہمیت شامل ہے۔
ایونٹ کے اختتام پر سفیروں، مختلف شخصیات، اداروں کے نمائندوں اور ان بچوں کو اعزازات دیے گئے جنہوں نے کینسر اور عضلاتی کمزوری جیسے امراض کا سامنا کیا۔ ڈاکٹر منى المنصوري کے مطابق یہ فیشن ویک بچوں کے لیے ثقافتی اور سماجی تبادلے کا پلیٹ فارم بنانے کی کوشش ہے، جو یو اے ای کی عالمی ایونٹس کی میزبانی، رواداری اور انسانیت دوست پیغام کو نمایاں کرتا ہے۔
