ترجمان پاکستان پیپلز پارٹی پارلیمینٹرینز شازیہ مری نے وفاقی بجٹ پر اپنے ردعمل میں کہا ہے کہ بجٹ میں عوام کو کوئی ریلیف نہیں دیا گیا ہے۔
نجی ٹی وی سے گفتگو میں رہنما پیپلز پارٹی شازیہ مری نے کہا کہ بجٹ سے ڈائریکشن سیٹ ہوتی ہے کہ آپ کے ریونیو کو حکومت کس طریقے سے خرچ کرے گی، حکومت نے کیا تخمینے لگائے ہیں اور اس کی ترجیعات کیا ہیں، بجٹ سے ان باتوں کا اندازہ ہوتا ہے اور ملکی معیشت کو ایک رخ ملتا ہے۔
اپنے بیان میں کہا ہے کہ مہنگی بجلی سے نجات کا واحد ذریعہ سول پینل تھا جس کو عوام سے دور کردیا گیا ہے، سولر پینل پر 18فیصد ٹیکس کو مسترد کرتے ہیں، موجودہ مہنگائی میں تنخواہوں اور پنشن میں 10فیصد اضافہ بھی ناکافی ہے، سرکاری ملازمین کی تنخواہوں میں 50 فیصد اضافہ ہونا چاہیے تھا۔
انہوں نے کہا کہ مہنگائی اور بیروزگاری سے لوگوں کی زندگی اجیرن ہے، لوگوں کو بجٹ میں کوئی ریلیف نہیں دیا گیا، پیٹرولیم مصنوعات پر اضافی ٹیکس سے مہنگائی میں اضافہ ہوگا۔
شازیہ مری کا کہنا ہے کہ حیدرآباد، کراچی موٹروے کے لیے صرف 15 ارب مختص کرکے مذاق کیا گیا، 15 ارب روپے اس منصوبے کے لیے ناکافی ہیں، یہ منصوبہ اس رقم سے مکمل نہیں ہوگا، لگتا ہے کام بھی شروع نہیں ہوگا۔
