وفاقی وزیر توانائی اویس لغاری کا کہنا ہے کہ حکومت پروٹیکٹڈ صارفین کیلئے بجلی سبسڈی ختم نہیں کر رہی۔ 200 یونٹ تک والے صارفین کی کیو آر کوڈ کے ذریعے رجسٹریشن کا مقصد سبسڈی کے استعمال کو منصفانہ بنانا ہے۔
اسلام آباد میں پریس کانفرنس کرتے ہوئے اویس لغاری نے بتایا کہ 200 یونٹ سے کم والے بجلی صارفین کیو آر کوڈ سے رجسٹریشن کرائیں، اصلاحات کا مقصد سبسڈی کے استعمال کو منصفانہ بنانا ہے، صرف میٹر مالکان نہیں بجلی بل دینے والے رجسٹریشن کرائیں۔
اویس لغاری نے کہا کہ حکومت پروٹیکٹڈ صارفین کیلئےبجلی سبسڈی ختم نہیں کر رہی، پروٹیکٹڈ صارفین کی تعداد4سال میں95 لاکھ سے بڑھ کر2 کروڑ 15 لاکھ ہوچکی، حکومت گزشتہ 4 سال کے دوران 527 ارب روپے کی سبسڈی دے چکی۔ اس وقت 2 کروڑ95 لاکھ 70 ہزاریعنی 86 فیصد صارفین کو سبسڈی فراہم کی جارہی ہے۔
وزیر توانائی نے کہا کہ آئی پی پیز معاہدوں پر نظرثانی سے 3.5 کھرب روپے کی بچت ہوئی ، ڈسکوزکے نقصانات میں کمی سے 193 ارب روپے کی بچت ہوئی ہے، 2024،25 میں سرکلر ڈیٹ میں 780 ارب روپے کی کمی ریکارڈ کی گئی ہے۔
اویس لغاری نے کہا کہ نیوکلیئرکے1200میگاواٹ کو سسٹم میں لائیں گے، 2035 میں قابل تجدید توانائی کا حصہ 90 فیصد کریں گے۔ حکومت مسقبل میں بجلی کی خریداری سے نکل جائے گی۔
