امریکی صدر ڈونلڈ ٹرمپ نے ایران کے ساتھ ایک ممکنہ معاہدے پر غور کے لیے وائٹ ہاؤس کے سیچویشن روم میں اعلیٰ سطحی اجلاس کی صدارت کی، تاہم تقریباً 2 گھنٹے تک جاری رہنے والی اس اہم مشاورت کے بعد بھی کسی حتمی فیصلے یا معاہدے کا اعلان نہیں کیا گیا۔
امریکی میڈیا رپورٹس کے مطابق صدر ٹرمپ نے اجلاس سے قبل کہا تھا کہ وہ ایران کے ساتھ مجوزہ سمجھوتے کے حوالے سے ’حتمی فیصلہ‘ کرنے جا رہے ہیں، لیکن اجلاس کے اختتام کے بعد وائٹ ہاؤس کی جانب سے صرف اتنا کہا گیا کہ صدر ایسا ہی معاہدہ قبول کریں گے جو امریکی مفادات اور ان کی مقرر کردہ شرائط کے مطابق ہوگا۔ اس کے ساتھ یہ بھی دہرایا گیا کہ ایران کو کسی صورت جوہری ہتھیار حاصل کرنے کی اجازت نہیں دی جائے گی۔
رپورٹس کے مطابق زیر غور معاہدے میں آبنائے ہرمز کو بحری آمد ورفت کے لیے مکمل طور پر کھولنے اور ایران کے جوہری پروگرام پر باضابطہ مذاکرات شروع کرنے کی تجاویز شامل ہیں۔ عالمی تجارت اور توانائی کی ترسیل کے لیے انتہائی اہم سمجھی جانے والی آبنائے ہرمز گزشتہ کئی ہفتوں سے خطے میں کشیدگی کا مرکز بنی ہوئی ہے۔
اجلاس میں امریکی وزیر خارجہ مارکو روبیو، نائب صدر جے ڈی وینس اور قومی سلامتی سے متعلق دیگر اعلیٰ حکام نے شرکت کی۔ تاہم اجلاس کے بعد یہ واضح نہیں کیا گیا کہ آیا صدر ٹرمپ نے مجوزہ معاہدے کی منظوری دے دی ہے یا مزید مشاورت کا فیصلہ کیا ہے۔
