امریکا میں روزگار کے مواقع میں کمی اور ملازمتوں کی سست روی کے حوالے سے ایک نئی تحقیق نے اس تاثر کو چیلنج کر دیا ہے کہ مصنوعی ذہانت نوکریوں کے خاتمے کی بنیادی وجہ بن رہی ہے۔ نیویارک فیڈرل ریزرو کی تازہ رپورٹ کے مطابق امریکی لیبر مارکیٹ میں سست روی کا آغاز چیٹ جی پی ٹی کی آمد سے پہلے ہی ہو چکا تھا، اس لیے تمام تر ذمہ داری مصنوعی ذہانت پر ڈالنا درست نہیں ہوگا
تحقیقی رپورٹ کے مطابق نیویارک فیڈرل ریزرو کے ماہرین نے ان شعبوں میں ملازمتوں کے رجحانات کا جائزہ لیا جو مصنوعی ذہانت سے زیادہ متاثر سمجھے جاتے ہیں، جن میں پروگرامرز، کسٹمر سروس نمائندگان اور ڈیٹا انٹری آپریٹرز شامل ہیں۔ تحقیق میں اینتھروپک کمپنی کے ماہرین معاشیات کی تیار کردہ پیمائش کو استعمال کرتے ہوئے نومبر 2022 میں چیٹ جی پی ٹی کے اجرا سے پہلے اور بعد کی صورتحال کا موازنہ کیا گیا۔
رپورٹ میں کہا گیا ہے کہ اگر مصنوعی ذہانت واقعی لیبر مارکیٹ میں بڑی تبدیلی کی بنیادی وجہ ہوتی تو چیٹ جی پی ٹی کے اجرا کے بعد متاثرہ اور غیر متاثرہ شعبوں میں بھرتیوں کا فرق واضح طور پر بڑھ جاتا، تاہم تحقیق میں معلوم ہوا کہ یہ فرق 2022 سے پہلے ہی شروع ہو چکا تھا۔
ماہرین کے مطابق مصنوعی ذہانت سے متاثر ہونے والے شعبوں میں ملازمتوں کے اشتہارات چیٹ جی پی ٹی کے آغاز سے پہلے ہی کم ہونا شروع ہو گئے تھے، جس سے ظاہر ہوتا ہے کہ روزگار کی سست روی کے پیچھے دیگر معاشی عوامل بھی کارفرما تھے۔
رپورٹ میں مزید بتایا گیا کہ 2024 کے آغاز میں مجموعی بھرتیوں کے رجحان میں بہتری دیکھی گئی اور ملازمتوں کی شرح دو برس کی بلند ترین سطح تک پہنچی، جبکہ برطرفیوں کی شرح 0.9 سے 1.2 فیصد کے درمیان رہی، حالانکہ متعدد کمپنیاں 2021 سے ملازمین کی تعداد کم کرنے کے لیے مصنوعی ذہانت کو وجہ قرار دیتی رہی ہیں۔
امریکی کمپنیوں سسکو، میٹا، گوگل اور ایمیزون سمیت کئی بڑی ٹیکنالوجی فرموں نے حالیہ عرصے میں ملازمین کی چھانٹیوں کو مصنوعی ذہانت سے جوڑا تھا۔
دوسری جانب گولڈمین سیکس کی ماہرِ معاشیات ایلسی پینگ کے مطابق اگرچہ مصنوعی ذہانت سے متاثرہ شعبوں میں ملازمتوں کے اشتہارات وبا سے پہلے کی سطح سے نیچے آ چکے ہیں، تاہم لیبر مارکیٹ میں مہارتوں کے عدم توازن میں کمی دیکھی جا رہی ہے، جو مستقبل میں استحکام کی علامت ہو سکتی ہے۔
