عیدِ قرباں میں صرف 13 دن باقی، کراچی کی مویشی منڈی میں تیاریاں عروج پر پہنچ گئیں۔ شہرِ قائد کی عوام دوست منڈی میں قربانی کے جانوروں کی خریداری میں اچانک تیزی آ گئی ہے، جہاں شہریوں کا تانتا بندھ گیا اور ہر طرف گہما گہمی نظر آ رہی ہے مختلف بلاکس میں خریداروں اور بیوپاریوں کے درمیان سودے طے پانے کی رفتار میں غیر معمولی اضافہ دیکھا جا رہا ہے۔ جانوروں سے لدی گاڑیاں ایک کے بعد ایک منڈی سے روانہ ہو رہی ہیں، منفی پروپیگنڈا کرنے والوں کو کرارا جواب مل گیا ہے کیونکہ بیوپاریوں کے وارے نیارے ہو رہے ہیں اور شہری اپنی من پسند قربانی کے جانور گھر لے جا رہے ہیں، انڈہ موڑ کے عبید ہوں یا صدر کے رہائشی، کسی کو ڈیڑھ گھنٹے میں تو کسی کو چار گھنٹے کی محنت کے بعد اپنا مطلوبہ جانور مل گیا،نارتھ ناظم آباد کے شہریوں نے تو خریداری کے ایسے گر بتائے کہ سب دنگ رہ گئے، صدر کے رہائشی فیصل نے محض 3 گھنٹے کی جدوجہد کے بعد ایک لاکھ 30 ہزار روپے میں خوبصورت بچھڑا خرید کر ‘میلہ لوٹ لیا،جے ڈی سی کے سربراہ ظفر عباس، معروف بزنس مین علی شیخانی، رضوان اور دیگر مخیر شخصیات کے ہمراہ منڈی پہنچے تو ماحول مزید گرما گیا۔ ظفر عباس نے اجتماعی قربانی کے لیے جانوروں کی بڑی کھیپ خرید لی اور عوام دوست منڈی کو اپنا ‘دوسرا مسکن’ قرار دے دیا،ففوڈ اسٹریٹ پر گفتگو کرتے ہوئے ظفر عباس کا کہنا تھا میں دنگ رہ گیا ہوں کہ اتنی بڑی تعداد میں جانور یہاں کیسے پہنچے؟ جنرل بلاکس میں انتہائی کم نرخوں پر من پسند جانور دستیاب ہیں۔ لوگ اپنی فیملیز اور بچوں کے ساتھ بلا خوف و خطر رات گئے یہاں آ رہے ہیں، جو اس بات کا ثبوت ہے کہ سیکورٹی کے انتظامات بہترین ہیں،جے ڈی سی کے سربراہ ظفر عباس نے بتایا کہ انہوں نے اب تک 6 سبی بیل، 9 گھینے اور ایک درجن سے زائد اونٹ خرید لیے ہیں، جبکہ اجتماعی قربانی کے لیے ابھی سینکڑوں اونٹ خریدنا باقی ہیں اسی دوران ایک مخیر خریدار نے مستحقین کے لیے سبی کا قیمتی اونٹ بھی عطیہ کر دیا، جس نے ایثار و قربانی کی نئی مثال قائم کر دی،ایڈمنسٹریٹرطارق تنولی کےمطابق منڈی کے راستوں پر پولیس اور رینجرز کا گشت جاری ہے جس کی بدولت شہری خود کو محفوظ تصور کر رہے ہیں جہاں ایک طرف لذیذ کھابوں کی خوشبو پھیلی ہے، وہیں دوسری طرف بیوپاریوں کی خوشی دیدنی ہے کیونکہ ‘عوام دوست منڈی’ واقعی عوام کی توقعات پر پوری اتر رہی ہے
