میٹا کی ملکیت والے میسجنگ پلیٹ فارم واٹس ایپ نے آئی فون صارفین کے لیے ‘واٹس ایپ پلس’ کے نام سے ایک نئی پیڈ پریمیئم سبسکرپشن سروس کا آغاز کردیا ہے۔ یہ سروس ابتدائی طور پر محدود آئی او ایس صارفین کے لیے دستیاب ہے، جبکہ آنے والے ہفتوں میں اسے وسیع پیمانے پر پیش کیا جائے گا۔
اس سبسکرپشن کی ماہانہ فیس 2.49 یورو (تقریباً 2.49 سے 2.99 امریکی ڈالر) مقرر کی گئی ہے۔ اہم بات یہ ہے کہ واٹس ایپ کی بنیادی سروسز جیسے میسجنگ، کالز اور فائل شیئرنگ بدستور مفت رہیں گی اور یہ نئی پیشکش صرف اضافی فیچرز کے لیے ہے۔
واٹس ایپ پلس کے تحت صارفین کو کئی جدید سہولیات فراہم کی جارہی ہیں جن میں سب سے نمایاں ‘چیٹ پننگ’ کی حد میں اضافہ ہے۔ مفت ورژن میں صرف 3 چیٹس پن کرنے کی اجازت ہے، جبکہ سبسکرائبرز اب 20 اہم چیٹس کو سب سے اوپر پن کرسکیں گے۔
اس کے علاوہ پریمیئم صارفین کو اینیمیٹڈ اسٹیکرز، کسٹم ایپ آئیکنز، منفرد تھیمز، مخصوص رنگ ٹونز اور جدید چیٹ لسٹ مینجمنٹ کی سہولت ملے گی۔ یہ اینیمیٹڈ اسٹیکرز دیگر عام صارفین کو بھی نظر آسکیں گے۔
سبسکرپشن کا ایک اور اہم فیچر ‘انہانسڈ چیٹ لسٹ’ ہے، جس کے ذریعے صارفین اپنے روابط (مثلاً دفتری ساتھیوں) کی الگ لسٹ بنا کر ان تمام چیٹس پر ایک جیسا تھیم یا نوٹیفکیشن ٹون سیٹ کرسکیں گے۔
ماہرین کے مطابق 2014 میں واٹس ایپ کی خریداری کے بعد میٹا کی جانب سے اس میسجنگ سروس کو مونیٹائز کرنے یعنی اس سے آمدنی حاصل کرنے کی جانب یہ پہلا بڑا قدم ہے۔ واٹس ایپ پلس کا بیٹا ورژن گزشتہ ماہ اینڈرائیڈ صارفین کے لیے بھی پیش کیا گیا تھا۔
