امریکا میں تعلیمی ویب سائیٹ کینوس پر بڑے سائبر حملے کے بعد ہزاروں اسکولوں، کالجوں اور جامعات کا نظام متاثر ہوگیا۔ حملے کے باعث طلبا اور اساتذہ کو ویب گاہ تک رسائی میں مشکلات کا سامنا کرنا پڑا۔
ہیکروں نے دعویٰ کیا ہے کہ انہوں نے لاکھوں طلبا اور عملے کا ریکارڈ حاصل کرلیا ہے۔ متاثرہ معلومات میں نام، برقی پتے، شناختی نمبر اور اندرونی پیغامات شامل ہیں۔
یہ واقعہ ایسے وقت میں پیش آیا جب کئی تعلیمی اداروں میں امتحانات جاری ہیں۔ طلبا کو اسائنمنٹس جمع کرانے، نتائج دیکھنے اور درسی مواد تک رسائی میں دشواری پیش آئی۔
متعلقہ کمپنی نے سائبر حملے کی تصدیق کرتے ہوئے متاثرہ نظام کو عارضی طور پر بند کر دیا ہے۔ حکام کے مطابق تحقیقات جاری ہیں اور نظام جلد بحال کرنے کی کوشش کی جا رہی ہے۔
ماہرین کا کہنا ہے کہ یہ حملہ ظاہر کرتا ہے کہ تعلیمی ادارے بھی اب بڑے سائبر خطرات کی زد میں ہیں، جہاں حساس معلومات اور تعلیمی سرگرمیاں نشانہ بن سکتی ہیں۔
