مکہ مکرمہ کی مسجد الحرام میں زائرین اور علما کے درمیان رابطے کو آسان بنانے کے لیے ایک نیا کلاؤڈ بیسڈ (آن لائن) نظام شروع کیا گیا ہے۔
حرمین شریفین کے مذہبی امور کے سربراہ شیخ ڈاکٹر عبدالرحمان السدیس نے اس نظام کا افتتاح کیا۔ اس نظام کے تحت زائرین اب کسی بھی وقت علماء سے براہ راست سوالات پوچھ سکیں گے۔
نیا نظام فون کالز کو خودکار طریقے سے متعلقہ علماء تک پہنچاتا ہے، جس سے انتظار کا وقت کم ہوگا اور مسجد الحرام میں رش بھی کم ہو جائے گا۔
حکام کے مطابق اس نظام کا مقصد زائرین کو بہتر اور تیز مذہبی رہنمائی فراہم کرنا اور ان کے روحانی تجربے کو بہتر بنانا ہے۔
نظام کی خاص بات یہ ہے کہ یہ 24 گھنٹے کام کرتا ہے اور کالز کو فوراً دستیاب عالم کے پاس منتقل کر دیتا ہے۔ اس کے لیے ایک مرکزی نمبر بھی جاری کیا گیا ہے، جس پر زائرین رابطہ کر سکتے ہیں۔
اس اقدام کو سعودی عرب میں ڈیجیٹل تبدیلی کی کوششوں کا حصہ قرار دیا جا رہا ہے، جس کا مقصد حج اور عمرہ زائرین کو بہتر خدمات فراہم کرنا ہے۔
