امریکی صدر ڈونلڈ ٹرمپ نے کہا ہے کہ پاکستان سمیت دیگر ممالک کی درخواست اور ایران کے ساتھ جاری مذاکرات میں پیشرفت کے بعد بحیرۂ ہرمز میں جہازوں کی نقل و حرکت سے متعلق ’پروجیکٹ فریڈم‘ کو عارضی طور پر روک دیا گیا ہے، جبکہ ایران کے خلاف جاری ناکہ بندی بدستور برقرار رہے گی۔
وائٹ ہاؤس کی جانب سے سوشل میڈیا پلیٹ فارم ایکس (ٹوئٹر) پر جاری بیان کے مطابق امریکی صدر ڈونلڈ ٹرمپ نے کہا کہ ایران کے خلاف مہم کے دوران امریکا کو ’بڑی فوجی کامیابی‘ حاصل ہوئی ہے۔ انہوں نے مزید بتایا کہ ایران کے نمائندوں کے ساتھ ایک مکمل اور حتمی معاہدے کی جانب نمایاں پیشرفت ہوئی ہے۔
صدر ٹرمپ کے مطابق دونوں فریقین نے باہمی طور پر اس بات پر اتفاق کیا ہے کہ اگرچہ ایران کے خلاف عائد ناکہ بندی پوری شدت کے ساتھ جاری رہے گی، تاہم “پروجیکٹ فریڈم” — جس کا مقصد آبنائے ہرمز سے جہازوں کی نقل و حرکت کو یقینی بنانا ہے — کو عارضی طور پر روک دیا جائے گا۔
انہوں نے کہا کہ اس فیصلے کا مقصد یہ دیکھنا ہے کہ آیا جاری مذاکرات کو حتمی شکل دے کر باقاعدہ معاہدے پر دستخط کیے جا سکتے ہیں یا نہیں۔ صدر ٹرمپ نے اس امید کا اظہار بھی کیا کہ یہ پیشرفت خطے میں کشیدگی کم کرنے اور استحکام لانے میں مددگار ثابت ہوگی۔
