اردو کے مشہور شاعر ناصر کاظمی کی یاد میں عجمان کے چائے شائے ریسٹورنٹ میں ایک ادبی محفل کا انعقاد کیاگیا جس کا اہتمام ڈاکٹر نور الصباح نے کیا۔تقریب میں قونصلیٹ جنرل آ ف پاکستان دبئی کے قونصل جنرل حسین محمد نے بطور خاص شرکت کی جبکہ دیگر شرکاء میں شاعر ناصر کاظمی کے قریبی عزیز مجتبیٰ کاظمی ، چودھری خالد حسین، حاجی محمد یٰسین، سہیل خاور ، سجاد اکبر خان، خاور حسین،
افتخار ہمدانی ، ڈاکٹر ظفر طاہر ، صباحت عاصم واسطی، فراز صدیقی اور دیگر شائقین علم و ادب شامل تھے- ناصر کاظمی کی یاد میں ادبی محفل کی نقابت عائشہ شیخ عاشی نے بطریق احسن کی-
اس موقع پر تقریب کی میزبان ڈاکٹر نور الصباح نے کہا کہ ناصر کاظمی اردو کے مشہور شاعروں میں سے ایک تھے، جو اپنے نرم، اداس انداز اور جذباتی طور پر بھرپور غزلوں کے لیے جانے جاتے ہیں۔ تنہائی، پرانی یادوں، ہجرت، محبت، اور خاموش دکھ کو سادہ مگر موسیقی کی زبان میں بیان کرنے پر انہیں خاص طور پر سراہا جاتا ہے۔1947 میں تقسیم ہند کے بعد وہ لاہور ہجرت کر گئے، اس تجربے نے ان کی شاعری پر گہرا اثر ڈالا۔انہوں نے ادبی صحافت میں کام کیا اور 1972 میں اپنی وفات تک اردو ادبی حلقوں میں سرگرم رہے۔وہ کلاسیکی اردو شاعری سے متاثر تھے لیکن اسے جدید جذباتی لہجہ دیا۔ان کے اظہار کی اداسی اور نزاکت کی وجہ سے انہیں اکثر میر تقی میر سے تشبیہ دی جاتی ہے۔ناصر کاظمی کا اردو ادب میں بڑا اثر رہا ہے۔ ان کی غزلیں اکثر مشہور گلوکار گاتے ہیں اور پاکستان اور ہندوستان بھر کے سامعین کے ساتھ گونجتی رہتی ہیں۔ بہت سے لوگ انہیں 20ویں صدی کے بہترین جدید اردو غزل کے شاعروں میں سے ایک مانتے ہیں۔
تقریب میں ناصر کاظمی کا کلام ترنم اور موسیقی کے ساتھ سنایا گیا جسے شرکائے تقریب نے بڑے ذوق و شوق سے سنا- تقریب میں موجود دیگر شعرا نے بھی اپنا کلام سنایا اور حاضرین سے داد و تحسین وصول کی- تقریب میں شامل لوگوں اور مہمان خصوصی نے تقریب کے انعقاد پر میزبان ڈاکٹر نور الصباح کا شکریہ ادا کرتے ھوئے امید ظاہر کی کہ وہ اس طرح کے علمی ادبی پروگرام آئندہ بھی پیش کرتی رہیں گی- تقریب کے آخر میں قونصل جنرل حسین محمد نے مہمانوں کو اعزازی شیلڈز اور انعامات بھی دیئے
