تقریباً 2 ماہ کے وقفے کے بعد ایل این جی کی آمد سے پاکستان کے توانائی شعبے کو بڑا سہارا مل گیا، جب ایل این جی بردار جہاز سی پیک میگیلن پاکستان گیس پورٹ ٹرمینل پر پہنچ کر نظام میں ری گیسفائیڈ مائع قدرتی گیس کی فراہمی شروع کر دی۔ اس پیشرفت کے ساتھ ہی حکومت نے قطر سے پھنسے ہوئے 4 ایل این جی کارگو حاصل کرنے کی کوششیں بھی تیز کر دی ہیں
میڈیا رپورٹ کے مطابق تقریباً ایک لاکھ 40 ہزار مکعب میٹر ایل این جی لے کر آنے والا یہ جہاز پاکستان گیس پورٹ کنسورشیم لمیٹڈ کے زیر انتظام ٹرمینل پر لنگر انداز ہوا، جبکہ یہ کارگو ٹوٹل انرجیز کے ذریعے 18.40 ڈالر فی ایم ایم بی ٹی یو کے حساب سے حاصل کیا گیا۔ ری گیسفیکیشن کا عمل ابتدا میں 50 ایم ایم سی ایف سے شروع کیا گیا، جسے بعد ازاں بڑھا کر 260 ایم ایم سی ایف تک پہنچا دیا گیا۔
حکام کے مطابق فراہم کی جانے والی گیس میں سے 45 ایم ایم سی ایف کے الیکٹرک کو دی جا رہی ہے جبکہ باقی گیس سوئی ناردرن گیس پائپ لائنز لمیٹڈ کے نیٹ ورک میں شامل کی جا رہی ہے۔
پاور ڈویژن کا کہنا ہے کہ 30 اپریل تک ملک میں لوڈ مینجمنٹ صفر رہی، اور ایل این جی کی نئی سپلائی سے بجلی کے نظام پر دباؤ میں مزید کمی متوقع ہے، خاص طور پر گرمیوں میں بڑھتی طلب کے پیش نظر۔
دوسری جانب حکومت آئندہ 10 سے 12 مئی کے درمیان ایک اور ایل این جی کارگو حاصل کرنے کے لیے بھی سرگرم ہے، جس کے لیے کھلی بولی یا سوکار کے ذریعے خریداری پر غور کیا جا رہا ہے۔
اہم بات یہ ہے کہ پاکستان اس وقت قطر سے آنے والے 4 ایل این جی کارگو کو حاصل کرنے کے لیے بھی کوششیں کر رہا ہے، جو آبنائے ہرمز میں رکاوٹوں کے باعث پھنسے ہوئے ہیں۔ اس معاملے پر قومی سطح پر غور کیا جا رہا ہے اور علی پرویز ملک نے ایرانی سفیر سے بھی رابطہ کیا ہے تاکہ محفوظ راستہ یقینی بنایا جا سکے۔
حکام کے مطابق حالیہ دنوں میں ڈیزل بردار جہاز کی کامیاب گزرگاہ کے بعد امید پیدا ہوئی ہے کہ ایل این جی کارگو بھی جلد پاکستان پہنچ سکیں گے، جس سے آئندہ ہفتوں میں ملک کی توانائی سیکیورٹی مزید مستحکم ہونے کا امکان ہے۔
